Psam 27:2-13

²Raghanina kagu aviya, iiyawogha na wawaya beroberodi sinagogona tagu biidi bi sinimatipo da kasunuyigu, na toudi wosina sinataguredi da sinabeku.

³Meboda aviya peyaridi sinapiika sinituwiikapudi da sinagogona tagu biidi, bi gegha da geananagharedina. Raghanina sinagogona tagu biidi, na tagu Yawe God kawagha anitumaghaneni.

⁴Tagu sawara tanagha kiiravine Yawe God avibabiini, sawara tanagha kawagha akayoveni: Yagu wiina kirakii da yagu yawa tupana kamone na yana bare kamone anamakae, bi anakita da touna imiise da awaki patana bi yana Bare Kabikabikuwayine anarupari touna biidi.

⁵Raghanina piropiro anabanani na yana gawara nighorovine inikowoyigu, bi yana bare kamone inababaregu, touna akima kiidamo kirakiine inatoregeeyegu meme kagu aviya gerubana sinakabiguna.

⁶Kagu aviya sinagwagwara wiikenaviviregu, bi gegha da animaragata kirakii da anageiwayidi. Yawe God yana bare kabikabikuwayina kamone tagu suwara anagibu, bi nuwamiiseye anarukwatu da anatawora bi inawa anarouwa da ayima anakabepepi.

⁷Yawe God, raghanina arupari tam biidi na kwawaiyanegu, kinuwanuwaghanegu bi yagu sisiya kuwonabodegu!

⁸Tam kuwonegu bo, Piika kunisisiya tagu biidi, na kata apiipiika tam biidi.

⁹Tagu yam wiitamariyana, genuwanuwam inapughu da kunamiiri kubuteguna, gegwabiguma kunakowoghana! Tam kuviyawiigu bi nonowa kwiiwiitegu, na kata gekunakuyoveguna!

¹⁰Meboda tamagunaki da sinagunaki sinamiiri kubutegu, bi gegha, Yawe God na nonowa inakoyakoyayigu.

¹¹Yawe God, kagu aviya sikoyakoyagha da sinaburavigu, na kiyevevegu da anakivinim, bi keda rotomanidiye kinaghovegu.

¹²Nokodi aviyidi kiiraviguve sisiya wiiyaba saberabera, yadi wiina da siniberogu, na gekuniwaghasinedi da sinaburaviguna!

¹³Bi gegha da iitumaghana da Yawe God miisena inabera tagu biidi, raghanina mmko kuburina debane patana yawayawiiguve amakamakena bi anakitani da noko inabera.