Salamo 27:2-13

²Ena tatao manamanabaradi se ialaigu eo se aipate bena se unuigu, agu waiunu eo isi tau hebaaeagu, abo se alabesibesi eo abo se beu.

³Taba iala tataodi gamagaridi se hetaiirigu, taba nige aruagu i loi; taba hinage se ialaigu, nuagu taba nige se hemoiu.

⁴Ginauri esega dumaduma GUIAU arinai ea aibodai, abo hinage ea eo’owatai: ia ede bena GUIAU ena numa eai ea miamia egu mauri asubenadi gamagaridi eai, GUIAU ana ao lolo dumadumana bena eai itaitai, eo bena ena dubu alona eai ea aiaibodalau.

⁵Paana ede huia baaea eai ena abaailogulogu eai abo i toreamuigu; ena apa birigomna eai abo i buburigu, ia abo i abiisinigu we’utau saesaena potana eai i toregu.

⁶Abotai eau urugu abo se lauisini agu waiunuyao se toro hetaiirigu ea saetawatawaidi, arinai ena numa lulu eai aitalasam abo ea gabudi ma wowogu; abo ea wana, eo GUIAU abo ea aihelahui!

⁷GUIAU e, ena ea eoga lailai bena u ataatai! Em abilolo bena u hemasara arigu eai, eo u heuioegu!

⁸U ribaeyao u ene, “Matagu u eo’oi.” Nuagu i heuioem, i ene, “GUIAU e, matam abo ea eo’oi.”

⁹Tabu matam u woeoi arigu eai. Em heaheari tauna tabu u aiduiei ma ouyalayalam, tau saguigu ede oa. Tabu u gabahesuaragu, tabu u nuagabaegu, abihemaurigu Eaubadana e!

¹⁰Taba tamagu eo sinagu se otaotaegu wa, GUIAU abo i abi’isinigu.

¹¹Oa em dobila u heatagu, GUIAU e, abalau masamasarahana eai u woeaigu agu waiunuyao debadi eai.

¹²Tabu u buigabaegu agu waiunu edi henuhenua aridi eai, paana tauribaribataubiga tataodi se toro bena se hebaaeagu, isi hinage heamamna laulaudi eahuadi eai.

¹³Ea awamamohoiei GUIAU ena abilolo abo ea ita tatao maumauridi edi eanua eai.