SALMOS 27:2-13

²Kate' benne' ka' bi zej nake' chawe' byéchjgekle' neda', ḻen benne' ka' žsáka'gake' neda', na' bi ẕḻé'egekle' neda' chawe', nich wžía yí'gake' neda', na' bejchégwgake', na' bedoé'egekle'.

³Ḻa'kze chéchjgekle benne' zan, benne' žjake' ḻo wdiḻe neda', benne' ka' bi ẕḻé'egekle' neda' chawe', bi žébekza'. Ḻa'kze žon byéngake' tíḻ-ḻena' ḻégake', neda' wx̱én ḻáže'kza' Dios.

⁴To da' ẕnnabla' X̱anžo Dios. Toze da' ẕdan ḻaža'a, dan' naken soa' liž X̱anžon' yógo'te ža soa' nbana', nich wláb ḻaža'a ka nak yeḻa' ẕen che X̱anžon', na' wcháḻjḻena' Ḻe' ḻo yodo' la'y chie'.

⁵Ḻe' wkache' chawe'e neda' ḻo latje la'y chie' kate' žin ža gak da' bi nak chawe'. Wkache' chawe'e neda' ḻo latjen' gan zoakze' Ḻe'. Wzóe' neda' to gan soa' chawe'.

⁶Naž gone' ga wzex̱jwa' benne' ka' bi ẕḻé'egekle' neda' chawe', benne' ka' zej nyechjle' neda'. Ḻo yeḻa' žebele gota' biado' ka' ḻo bkog la'y chie'. Goḻkza', na' wká'n ẕenkza' X̱anžon'.

⁷X̱ana' Dios, benle chi'a kate' žḻiža' Le'. Beyache' ḻaže'l neda', na' bechebe chia'.

⁸Ḻo yichj ḻáẕda'wa' benla' chi'o, na' wnnó': “Da ga zoa' ni.” Yida' gan zo' Le', X̱ana' Dios.

⁹Bi wkache' ḻawo' Le' ḻawa' neda'. Ḻo yeḻa' ẕža'a chio' bi yebigo'o gan zoa' neda', wen žin chio'. Toze Le' žákḻeno' neda'. Bi wsano' neda', na' bi kwej yichjo' neda', Dios, weslá chia'.

¹⁰Ḻa'kze wsangak x̱a x̱na'a neda', yeka'akze X̱anžo Dios neda'.

¹¹Bsedle neda' da' žak ḻažo'o gona', X̱ana' Dios, na' bḻoe'el neda' da' naken ḻi ḻaže' da' žaḻa' gona', dan' zej nyan benne' ka' bi ẕḻé'egekle' neda' chawe'.

¹²Bi go'o latje benne' ka' wžía yí'gake' neda'. Zej nyechjle benne' wen ḻaže' ka' neda', na' žesbága'gake' neda' ẕia.

¹³X̱anžo Dios bchebe ḻaže'e ḻe'ela' da' chawe' chie' gan sóateza' nbana'. Chela' bi žejḻi'a da' ni, na' gat ni'a na'a.