SALMOS 25:4-9

⁴TOTECO, technextili moojhui. Quena, technextili nopa pilojtzi campa tijnequi ma ninejnemi.

⁵Techyacana ipan moojhui catli xitlahuac huan techmachti, pampa ta tinoTeco Dios huan tinotemaquixtijca. Mopan ta nimotemachía ipan tlen hueli hora.

⁶TOTECO, xiquelnamiqui moteicnelilis catli tijpixtoc para nochipa, catli hasta tlen huejcajya titenextilijtoc, huan yeca techtlasojtla.

⁷Amo xiquelnamiqui notlajtlacolhua catli nijchijqui quema nitelpocatixtoya. Xiquelcahua quema nimotlepanitayaya moixpa. TOTECO, techelnamiqui ica motlaicnelilis pampa hueyi moyolo nohuaya.

⁸TOTECO, ta nelía ticuali huan tixitlahuac. Yeca tiquinnextilía tlajtlacolchihuani nopa cuali ojtli catli ipan ma nejnemise.

⁹Tiquinyacana catli moicnonequij ipan nopa ojtli catli más xitlahuac. Quena, tiquinmachtía inijuanti catli quitemohuaj tlaque mopaquilis.