SALMOS 145:7-20

⁷Nochi masehualme ipan tlaltipactli camanaltise para nelía ticuali huan hueyi moyolo. Quiijtose para tijchihua san catli xitlahuac.

⁸TOTECO, hueyi moyolo huan tlahuel titetlasojtla. Amo nimantzi ticualani huan titeicnelía miyac.

⁹TOTECO ta cuali moyolo ica nochi masehualme huan motlaicnelijcayo monextía ipan sesen tlamantli catli tijsencajtoc.

¹⁰TOTECO, nochi tojuanti catli ta techchijchijtoc timitztlascamatij. Quena, nochi tojuanti catli timitztoquilíaj timitzpaquilismacase.

¹¹Tojuanti sentic timocamanalhuise tlen ihueyitilis motlanahuatilis campa ta titlanahuatía, huan ticamanaltise quenicatza tijpiya hueyi chicahualistli.

¹²Titepohuilise tlen nopa huejhueyi tiochicahual nextili catli tijchijtoc, huan tlen moyejyejca huan tlen ihueyitilis motlanahuatilis campa ta titlanahuatía.

¹³Pampa motlanahuatilis amo quema tlamis. Ta tijpiyas tlanahuatili ica nochi masehualme catli tlacajtiyase para nochipa.

¹⁴Ta TOTECO tiquintlanana nochi catli huetzij, huan tiquinfuerzajmaca catli itztoque ipan tequipacholi.

¹⁵Nochi masehualme ipan tlaltipactli mitztemohuaj, huan mitzchiyaj para xiquinpalehui. Ta tiquinmaca inintlacualis quen quinmonequilijtihuala.

¹⁶Ta ica momax tiquintiochihua nochi catli yoltoque, pampa tiquinmaca catli quicuase huan catli quiijise.

¹⁷TOTECO quichihua san catli xitlahuac, huan quinextía para hueyi iyolo ipan nochi catli quichihua.

¹⁸TOTECO itztoc ininnechca nochi catli quinotzaj. Quena, itztoc ininnechca nochi catli quitemohuaj ica nochi ininyolo.

¹⁹Yaya quinmaca catli quinequij nochi masehualme catli quiimacasij huan quitlepanitaj. Quintlacaquilía quema quitzajtzilíaj ma quinpalehui huan quinmaquixtía tlen catli amo cuali.

²⁰TOTECO quinmocuitlahuía nochi catli quiicnelíaj, pero nochi catli amo quitlepanitaj, Toteco quintzontlamiltis.