Y Salmo Sija 145:7-20

⁷Ujasangan y majason dinangculon y minaulegmo, ya ufanganta ni y tininasmo.

⁸Si Jeova, cariñosogüe, yan bula minaase; ñateng para ulalalo, ya dangculo minaaseña.

⁹Si Jeova mauleg para todo: ya y cariñoso na minaaseña gui jilo todo y chechoña.

¹⁰Todo y chechomo uninalaba jao, O Jeova; ya y mañantosmo unmabendise jao.

¹¹Ujasangan y minalag y raenomo, yan ufanguentos ni y ninasiñamo.

¹²Para ujanamatungo y matatnga na finatinasña sija gui lalajen taotao, yan y minalag y minagasña gui raenoña.

¹³Y raenomo, taejinecog na raeno, ya y gobietnomo gagaegueja para todo y generasion.

¹⁴Si Jeova mumantiene todo ayo sija y mamodong, yan jajatsa todo ayo y manetecon.

¹⁵Todo y atadog sija numanangga jao; ya jago numae sija nañija gui mauleg na tiempo.

¹⁶Unbaba y canaemo, ya unnafannajong todo y minalago y manlâlâlâ na güinaja.

¹⁷Si Jeova tunas güe gui todo y chalanña; ya cariñoso gui todo y chechoña.

¹⁸Si Jeova jijot gui todo ayo sija y umaagang gue; gui todo ayo y umaagang güe ni y minagajet.

¹⁹Güiya unafanbula y minalago ayo sija y manmaañao nu güiya: ujungog locue y inagangñija, ya usatba sija.

²⁰Si Jeova jaadadaje todo ayo sija y gumaeya güe: lao todo y manaelaye uyulang.