SALMOS 144:2-11

²Yaya nechtlasojtla huan yaya nechpixtoc campa temachtli. Yaya nechpixtoc imaco huan nechchololtis tlen nocualancaitacahua. Yaya notlamanahuijca huan ipan ya nimotemachijtoc. Yaya quintlalijtoc nomaco miyac tlalme ica ininmasehualhua para ma niquinnahuatis.

³TOTECO, ¿tlaque topati timasehualme para toca timocuatotonía? ¿Tlaque topati para tlahuel ta techpatiita?

⁴Pampa tonemilis san panotehua quen se ajacatl huan quen se ecahuilotl.

⁵TOTECO, xijcuelpacho nopa ilhuicactli huan xitemo techpaxaloqui. Sintla tiquinpanajsis nopa tepeme, popocase.

⁶Xijtitlani tlapetlanilotl quen elisquía cuatlamintli, huan xiquinsemana nochi mocualancaitacahua huan amo quimatise tlaque quichihuase.

⁷Hasta tlen nepa ilhuicac xijxitlahua momax huan techmaquixti. Techchololti ininmaco ni nocualancaitacahua catli sequinoc tlalme ehuaj huan tlahuel quipiyaj chicahualistli. Na nijmati quen nimisahuisquía ipan se atl catli tlahuel huejcatla.

⁸Inijuanti san quinpactía istlacatise. Tlatestigojquetzaj para quiijtose catli melahuac, huan nimantzi istlacatij.

⁹NoTeco Dios, na nihuicas huicatl catli yancuic, huan nitlatzotzonas ipan noarpa catli quipiya majtlactli cuerdas.

¹⁰Pampa ta catli tiquinchihua ma tlatlanica tlanahuatiani. Ta catli techmaquixti na nimotequipanojca, David, para ma amo nechmictica ica machete.

¹¹Nojquiya techmaquixti huan techmanahui ininmaco nocualancaitacahua, pampa inijuanti san teistlacahuíaj huan tlacajcayahuaj.