1¡Xijpaquilismacaca TOTECO! Quena, xijpaquilismacaca nochi amojuanti anitequipanojcahua.
2Xijpaquilismacaca nochi amojuanti catli anitztoque ipan ichaj TOTECO huan catli annentinemij icalixpa.
3Xijpaquilismacaca TOTECO pampa yaya nelía cuali. Xijhuicatica ica tiohuicatl pampa yaya hueyi iyolo.
4Pampa TOTECO quitlapejpenijtoc Jacob para quiicnelis. Quintlapejpeni nochi iixhuihua ma elica iaxcahua.
5Na nijmati para TOTECO tlahuel hueyi. Nijmati para yaya tlahuel más hueyi que nochi catli quintocaxtíaj “dioses”.
6TOTECO quichihua nochi catli quinequi quichihuas ipan ilhuicactli, tlaltipactli, huan ipan hueyi atl huan campa más huejcatla.
7Quichihua para ipan nochi tlaltipactli ma motlanana mixtli, huan nojquiya quititlani tlapetlanilotl huan quichihua ma tlaquiyahui. Yaya quinahuatía ma quisa nopa ajacatl campa moajoctoc.
8Quichijqui ma miqui nopa achtihui ejquetl ipan sesen familia tlen tlali Egipto, huan nopa achtihui ejquetl tlen inintlapiyalhua.
9Quichijqui huejhueyi tiochicahual nextili ipan tlali Egipto iixpa Faraón huan itequipanojcahua.
10Quintzontlamilti miyac masehualme ipan miyac tlalme. Quinmicti tlanahuatiani catli quipiyayayaj miyac chicahualistli.
11Quimicti Sehón catli eliyaya inintlanahuatijca nopa amorreos. Nojquiya quimicti Og tlanahuatijquetl tlen tlali Basán huan nochi nopa tlanahuatiani ipan tlali Canaán.
12Huan nochi nopa tlali catli quinahuatiyayaj nopa tlanahuatiani quincuili, huan quinmacac nopa tlalme nopa israelitame quen elisquía se tlamantli catli inintata quincahuilijtejqui.
13TOTECO, masehualme mitzelnamictose para nochipa. Nochi masehualme catli tlacajtiyase mitziximajtose para tlahuel tihueyi.
14Pampa TOTECO quintlajtolsencahuas xitlahuac nochi imasehualhua, huan yaya quintlasojtlas itequipanojcahua.
15Nopa masehualme catli itztoque ipan tlalme catli amo quiiximatij Toteco, quinhueyichihuaj teteyome tlen oro huan plata catli quinchijchijtoque ica ininmax.