1Leemi asu ri Leeme Silok. Nemi lavasaxaruki at Leeme Silok, mina emi asu mi laasen teren.
2La nemi bok mo mi gugu ro at loogu laplavang at Leeme Silok, ni loogu at ne Moroa atnedik, mina emi asu mi laasen teren.
3Mina emi asu mi Leeme Silok atla neni i vukat. Minak pixan emi asu ri laasen teren, atla mo loklok i nunuan aleng.
4Neni ga soxolik kaka limixin at ne Jakop kusu tin. Neni ga soxolik ka limixin me Israel kusu ateren akmokso.
5Aklen i do Leeme Silok atnedik i nunuan aleng pologat, la i silok polo mo leven moroa vetpes.
6Neni i epovo na lok lempanga salai neni i vara i to vana at laxalibet, la de at lavatbung menemen, to xeneng at laras la to xopok tubu at lisimaramain.
7Neni ik lox asuusu lamanman takabu boro axa at latnese at lavatbung menemen. La ik lok lavanga i mam su boro at lamanman takabu, la i susuang asu lamanman boro at loogu lili ren.
8Neni ga sev amet laxamdak temes avot at limixin me Isip, la lempanga bok mi lavanuet kangkedek atdi.
9Neni ga lox asuusu bok lempanga lolos la sangsangu xusu ti lox asongot loorong eburu mi luvuttadi silok ua diga gugu maxopok teren.
10Neni ga sele utut buaang levenabung mixin, la ga sev amet lavaorong lolos.
11Nedi ne Sion loorong at leme Amor, Ok loorong at leme Basan, la nedi lavaorong axap me Kanan.
12Neni ga lok ka levennep kangka atnedi na lavaorong la ga raba limixin teren min. Neni ga raba leme Israel min.
13Leeme Silok, limixin dinaba tong asuusu amisix i do nenu ne Moroa. La lavaola axap melemu dinabam domasu ram.
14Leeme Silok naba tupe limixin teren. Neni naba lox asuusu lebelen tuntun ti lavaanat soxolik teren.
15Limixin boro at levenabung mixin petpes dik lok levenmoroa atdi mi la siliva la gol. Luvuttadi mun mede xopok di vop di mi leventingen di.