SALMOS 119:37-111

³⁷Techhuejcatlali tlen nochi tlamantli catli amo cuali para amo niquixtocas. Más cuali tlatoctzitzi techyolchicahuas para senquistoc ninemis ipan moojhui.

³⁸Techmatilti na, nimotequipanojca, para temachtli techmacas catli techtlajtolcahuilijtoc, pampa san ta nimitzimacasi huan nimitztlepanita.

³⁹Amo techcahuili ma niquinimacasi catli nechpinahualtíaj pampa nimitztlepanita, pampa motlamachtil senquistoc cuali huan xitlahuac.

⁴⁰TOTECO, na tlahuel nijnequi nijchihuas catli quiijtohuaj motlanahuatilhua. Xijyancuili nonemilis pampa ta senquistoc tixitlahuac.

⁴¹TOTECO, techtlasojtla huan techmaquixti tlen nocualancaitacahua, san quen tiquijtojtoc tijchihuas.

⁴²Quej nopa huelis niquinnanquilis inijuanti catli nechpinahualtíaj, huan niquinmatiltis para san nimotemachía ipan mocamanal.

⁴³Amo techquixtili mocamanal catli melahuac huan amo techcahuili ma niquelcahua, pampa san ipan motlamachtil na nimotemachía.

⁴⁴Na nijtlepanitas moley mojmostla. Quena, para nochipa nijtlepanitas moley huan amo quema tlamis.

⁴⁵Ninemis nimajcajtoc pampa niquintemohua motlanahuatilhua para nijchihuas catli quiijtohuaj.

⁴⁶Na niquinpohuilis motlajtol tlanahuatiani, huan amo nimopinahuas.

⁴⁷Na nimopaquilismacas ipan motlanahuatilhua pampa tlahuel niquinicnelía.

⁴⁸Nimomatlananas para nijnextis notlatlepanitacayo por motlanahuatilhua, huan san nimonejnehuilijtinemis tlen nochi catli techyolmelajtoc ma tijchihuaca ipan tonemilis.

⁴⁹Amo quema xiquelcahua catli techtlajtolcahuilijtoc techchihuilis na, nimotequipanojca, pampa san ya nopa nijchixtoc.

⁵⁰Catli techtencahuilijtoc techchihuilis nechyoltlalía quema nimopantía ipan tlaijiyohuilistli. Quena, nochi catli tiquijtojtoc nechmaca yancuic chicahualistli ipan nonemilis.

⁵¹Nopa masehualme catli mohueyimatij nechpinajtíaj pampa nimitztlepanita, Toteco, pero masque ya nopa, na amo nimohuejcatlalis tlen moley.

⁵²TOTECO, na niquelnamiqui motlamachtil catli huejcajya techmacac. Huan motlamachtil nochipa nechyoltlalía.

⁵³Nelía tlahuel nicualani ica nopa tlaixpanoca masehualme catli quitlahuelcahuaj moley.

⁵⁴Nochi catli techyolmelajtoc nechhualiquilijtoc paquilistli, huan nechchijtoc ma nihuica campa hueli campa niitztinentoc quen niseyoc tlali ejquetl.

⁵⁵Ica tlayohua nimitzelnamiqui, TOTECO, huan nijnequi nijchihuas catli quiijtohua moley.

⁵⁶Nijseli tlahuel miyac tlatiochihualistli pampa nijchijqui catli quiijtohuaj motlanahuatilhua.

⁵⁷¡TOTECO, san ta tinoaxca! Na niquijtojtoc para nijtlepanitas catli quiijtohua mocamanal.

⁵⁸Ica nochi noyolo nijnequi motlatiochihualis. Techtlasojtla senquistoc quen techtlajtolcahuilijtoc para tijchihuas.

⁵⁹Nimotlachili quenicatza nimonejnemilti huan nimantzi nimocuepqui para nijchihuas catli quiijtohua motlajtol.

⁶⁰Quena, nimoisihuiltía para nijchihuas catli quiijtohuaj motlanahuatilhua.

⁶¹Miyac tlaixpanoca masehualme nechyahualojtoque para nojquiya ma nitlajtlacolchihua ininhuaya, pero na amo niquelcajtoc moley.

⁶²Tlajco yohual nimehua para nimitztlascamatis por motlamachtil catli senquistoc xitlahuac.

⁶³Na niquinita quen nohuampoyohua nochi catli mitzimacasij huan mitztlepanitaj, huan nochi catli quichihuaj catli quiijtohuaj motlanahuatilhua.

⁶⁴¡TOTECO, nochi tlaltipactli temitoc ica motlaicnelijcayo! Technextili nochi catli techyolmelajtoc ma nijchihua ipan nonemilis.

⁶⁵¡TOTECO, tlahuel techchihuilijtoc catli cuali na, nimotequipanojca! Techtiochijtoc senquistoc quen tiquijtojtoc para tijchihuas.

⁶⁶NoTeco, techchihua ma nijmachili catli cuali huan techmaca tlalnamiquilistli, pampa na niquinneltocatoc motlanahuatilhua.

⁶⁷Achtihuiya quema ayamo techechcapantlalijtoya para techtlatzacuiltis, san nimocuapolojtinenqui. Pero ama senquistoc nijchihua catli quiijtohua mocamanal.

⁶⁸Ta nelía ticuali huan tijchihua san catli cuali. Huajca techmachti quenicatza ma nijchihua catli techyolmelajtoc para nijchihuas.

⁶⁹Nopa masehualme catli mohueyimatij nechistlacahuijtoque, pero na ica nochi noyolo nijchijtinemis catli quiijtohuaj motlanahuatilhua.

⁷⁰Inijuanti huihuitique huan tzactoc inintlalnamiquilis, pero na nochipa nimopaquilismaca ipan moley.

⁷¹Nelía cuali para techechcapantlali, pampa technextili para ma nijchihua nochi catli techyolmelajtoc ma tijchihuaca ipan tonemilis.

⁷²Para na más ipati moleyes huan amo millones tlen oro huan plata.

⁷³TOTECO, ta ica momax tijsencajqui notlacayo. Huajca ama techpalehui ma niquinmachili motlanahuatilhua huan niquintzontecomatis.

⁷⁴Nochi catli mitztlepanitaj huan motemachíaj ipan ta, paquise quema nechitase, pampa na nimotemachía ipan mocamanal.

⁷⁵TOTECO, na nijmati para motlamachtil senquistoc xitlahuac. Huan nopa tlatzacuiltili catli techmacatoc nojquiya xitlahuac, huan nechhualiquilis tlamantli catli cuali.

⁷⁶Huajca ama techyoltlali ica moteicnelijcayo, senquistoc quen techilhuijtoc na, nimotequipanojca, para tijchihuas.

⁷⁷Techyahualo ica motlaicnelijcayo para ma niyolto, pampa san ipan moley nijpantía paquilistli.

⁷⁸Ma huetzica ipan pinahualistli nopa masehualme catli mohueyimatij, pampa tlahuel nechcocojtoque ica iniistlacaticayo. Pero na san nimonejnehuilijtinemis catli quiijtohuaj motlanahuatilhua.

⁷⁹Ma sempa mosentilica nohuaya nopa masehualme catli mitzimacasij huan mitztlepanitaj, huan catli quiiximatij motlajtol.

⁸⁰Xijchihua para noyolo ma monejnemilti xitlahuac ipan nochi catli techyolmelajtoc. Huan quej nopa amo quema nimopinahualtis.

⁸¹Na nitlapolosnequi pampa nijchiya para techmaquixtis tlen nocualancaitacahua, pampa nimotemachijtoc ipan catli tiquijtojtoc para techchihuilis.

⁸²Noixteyolhua siyahuij pampa quinequij quiitase ma pano nochi catli techtlajtolcahuilijtoc para tijchihuas. ¿Hasta quema techyoltlalis ica motlapalehuil?

⁸³Ya nihuehuentzi huan nitzocoyolijtoc quen se cuetlax bolsa catli quitlalijtoque campa poctli, pero amo niquelcajtoc catli techyolmelajtoc.

⁸⁴¿Quesqui tonali monequi nijchiyas para tiquintlatzacuiltis catli nechtoquilijtinemij?

⁸⁵Nopa masehualme catli mohueyimatij huan catli quicualancaitaj moleyes quichijtoque se hueyi ostotl para ma nimasi.

⁸⁶Techpalehui, pampa motlanahuatilhua senquistoc xitlahuac, huan nechtepotztocatinemij masque amo tleno nijchijtoc.

⁸⁷San quentzi nechixpolihuiltíaj, pero na amo niquinixpanotoc motlanahuatilhua niyon amo niquincajtoc.

⁸⁸Pampa hueyi moyolo, techcahuili ma niitzto. Huan quej nopa nijsenhuiquilis nijchihuas catli quiijtohua motlajtol.

⁸⁹TOTECO, mocamanal eltos temachtli para nochipa nepa ilhuicac.

⁹⁰Mojmostla ta titemachtli huan tiitztos temachtli ica nochi catli tlacajtiyase para nochipa. Cuali ta tijtlatzquilti ni tlali huan quej nopa eltoc.

⁹¹Nochi tlamantli mocahua campa tiquinnahuati ma eltoca hasta ama ni tonal. Quena, nochi tlamantli catli tijchijqui mitzneltocaj huan mitztequipanohuaj.

⁹²Sintla amo nimopaquilismacatosquía ipan moley, huajca ya nimictosquía ica tequipacholi.

⁹³Amo quema niquinelcahuas motlanahuatilhua, pampa ica motlanahuatilhua techmacatoc yancuic chicahualistli.

⁹⁴Na nimoaxca, techmaquixti pampa nochipa nijchijtinentoc catli quiijtohuaj motlanahuatilhua.

⁹⁵Masque nopa tlaixpanoca tlacame motlatise ipan ojtli para nechtzontlamiltise, na san nimonejnehuilijtos tlen motlajtol.

⁹⁶Nochi tlamantli catli más cuajcualtzi niquitztoc canque ontlami, pero motlanahuatilhua, amo quipiyaj inintlamiya.

⁹⁷¡Tlahuel niquicnelía moley! San tlen ya nimonejnehuilijtinemi semilhuitl.

⁹⁸Motlanahuatilhua nechchijtoque más nitlalnamiqui que nocualancaitacahua. Pampa motlanahuatilhua nechyacantiyohuij mojmostla.

⁹⁹Quena, achi más nitlalnamiqui hasta niquintlani inijuanti catli notlamachtijcahua, pampa na nimonejnehuilijtinemi tlen motlajtol.

¹⁰⁰Na más nijmachilía que nopa huehue tlacame, pampa nijchihua catli quiijtohuaj motlanahuatilhua.

¹⁰¹Amo quema nijnectoc nijtoquilis se ojtli catli amo cuali, pampa senquistoc nijnequi nijchihuas catli quiijtohua mocamanal.

¹⁰²Amo nimohuejcatlalijtoc tlen motlamachtil, pampa ta technextilía quenicatza ma nimonejnemilti.

¹⁰³Nijmati nelía ajhuiyac mocamanal. Achi más tzopelic nijmati que sayolnectli.

¹⁰⁴Motlanahuatilhua nechmacaj tlalnamiquilistli. Yeca amo nijnequi niquitas niyon se tlamantli istlacatili.

¹⁰⁵Mocamanal eltoc quen se tlahuili catli quitlahuilía noojhui campa ninejnemi para amo nimotepotlamis.

¹⁰⁶Se huelta nitlatestigojquetzqui, huan ama sempa nitlatestigojquetzas para nijchihuas catli quiijtohuaj motlamachtilhua pampa nelía xitlahuac.

¹⁰⁷TOTECO, nechcatitoc para nimiquis ininmaco nocualancaitacahua. Techmaca yancuic chicahualistli quen tiquijtojtoc para tijchihuas.

¹⁰⁸TOTECO, nimitztlajtlanía xijseli nopa tlascamatili catli nimitzmaca quen se tlacajcahualistli. Huan technextili motlamachtil.

¹⁰⁹Mojmostla nimopantía campa mahuilili para nonemilis, pero amo niquelcajtoc moley.

¹¹⁰Nopa tlaixpanoca masehualme quitlalíaj tlaquetztli para ma nimasi huan nihuetzis ipan tlajtlacoli, pero na amo nimoiyocanequis tlen motlanahuatil.

¹¹¹Na san nimoaxcatijtoc motlajtol, pampa san ipan motlajtol nijpantía paquilistli.