SAM 119:37-111

³⁷Gata gatangami sanga yapiina wena, moo akngae masa yamit. Gika ayawi kekekakut taknga saak na katak toimso.

³⁸Na gikane puya amin tapaka gae akgwaukgatde wamu gika naniwi kekekakut taknga saak tasiyo.

³⁹Sike aminu kunduta nandupa aminu waiapa siwik kakngae apbitanggat. Siwan sanga waaknga sandekngami take siwik. Dasingge, gatane mama wambae natapa take siknga singgak.

⁴⁰Na gatane mama wamba kuutgan tawambitde take siknga nataat. Gatane yuyukga noman gan siknga. Unzingge kayuk yutnanga aknga gata namuyo.

⁴¹Buyambam tapa, gata nae take siknga natangamunggayak kaknga yeikngamuyo. Yeikngamuke na gatuka tapso. Unzing tasinangge gwa yawi kekekakut.

⁴²Na gata unzing gatangami aminu atnanisapdutningu yake yaniwit. Dasingge, na gatane wam takngae banip singgat.

⁴³Gata gikane siakan wam takngaka genane ma sandewim. Dasingge, na gatane wamu noman takngae baniu asinggat.

⁴⁴Sike nata gatane mama wamba asinggan tawambit. Ngan, asinggan asinggan tawambit.

⁴⁵Na gatane wam taknga natdetnangge tawanggat. Unzingge waiakngata dua umukngaman na meya dua kake takekan sukuwit.

⁴⁶Siwan nata king takwau gatane wam takngae yanikapit. Na unzing tasiwa aminu kunduta na maakawitde tasiwa maiwik.

⁴⁷Dasingge, na gatane mama wamde natapa take siknga singgak. Siwan mama wamu waaknga tawanangge musip gwaang nataat.

⁴⁸Sike na gatane mama wam takngaka yatangenakgat. Gatane mama wambae natapa take siknga singgak. Siwan nata asingganu gatane mama wamu waakngae natanggamatanggat.

⁴⁹Gata gatuka wamu tupa nae yawi kekekakut takngae natapso. Na puya aminda. Wamu waakngata musipma tangenawan nata wamu yawi kekekakut takngae banip singgat.

⁵⁰Sike tapduu meya kaya sikut kopatangu na musip kwikwik takum. Dasingge, ayawi kekekakut takngata kayuk yutnanga aknga inata kundu namukut.

⁵¹Sike yamandet aminda sapdut wamu wai siknga tendeknga wena nanikaing. Siwan ngana na gatane mama wamde masa dua imunggat.

⁵²Buyambam tapa, na mama wamu tupa siknga namukuyak takngae natayuat. Sike wamu waakngae natake musipmaatang kwikwiknga nataat.

⁵³Sike nata kaawanu yamandet aminda gatane mama wamba gwa peking. Pewa kake nata musipma toknga siknga nataat.

⁵⁴Sike keu andakane yukuuk gatane mama wamde natake kap taiwit.

⁵⁵Buyambam tapa, na zikaane gatane umandae atnatayuat. Natayuke gatane mama wamba tawanggat.

⁵⁶Gatane mama wamu nata kuutgan tawanggat. Ngan, gatane wamu waaknga asinggan asinggan apbakngake gwaamukgat.

⁵⁷Buyambam tapa, ga naat yuke gae natapa take siknga singgak. Nata gae anzing yawa kekekakut, “Nata itane mama wamu kuutgan tawambit,” ngang yakum.

⁵⁸Gata musip kwikwiu nae namiyakge kekeknga siknga ganikwaikgat. Dasingge, gika unzing tasinangge gwa yawi kekekakut.

⁵⁹Na kepi sukunggatde atnatapasinggat. Unzingge apmanu gae mama wam tawambitde gwa yawa kekekanggak.

⁶⁰Sike na moo dua yuwit. Gatane mama wamu zet tawambit.

⁶¹Na wai aminda napda wamake inane waiakngaatang nanitake kunangge tasikaing. Siwan ngana na gatane mama wamde dua botawit.

⁶²Sike petakumat dakaatangu na asenake gatane mama wamu noman takngae natake ganimbaknganggat.

⁶³Na gae akgwauke mama wamba tawakaing aminkat naat notna notna yuamang.

⁶⁴Buyambam tapa, ga keu andakane yuaing aminu kuupbamde take siknga nataayak. Gikane mama wamu kuupbam siknga nanindamumso.

⁶⁵Buyambam tapa, gata nae takeaknga tasinggayak. Na puya amin tapakaen. Gika wamu ayawi kekekakut taknga saak tasingamunggayak.

⁶⁶Na gatane mama wamu kuupbamde banip siknga singgat. Unzingge gata nanindamumbi natdetdeu take aknga pake sanga kuupbam katak usanziwit.

⁶⁷Tupa gata nae kepi yeikngamukuyau atekum. Teke kuwa nanduke gata meya takngatu takngatu atnamukuyak. Nami kake apmau nata gatane wamu atawanggat.

⁶⁸Sike ga take siknga. Ge sanga gata tasinggayak kakngae natapa take singgak. Siwan gata mama wamba katak siknga nanindamumso.

⁶⁹Sike yamandet aminda kem wamu kwaapzang nanisapduking. Siwan ngana na natdetdeu takngatu wena. Na gatane mama wamba asiknga tawambit.

⁷⁰Aminu waakwau natdetdeu butaya aknga takngatusimu wena. Sike ngana na gatane mama wamde siknga nataat.

⁷¹Gata meya aknga namukuyakge natapa take singgak. Dasingge? Meya waakngata gatangaman mama wambae take siknga natdekum.

⁷²Na moningu buyambam siknga panangge take dua nataat. Siwan ngana gatane mama wambae take siknga nataat.

⁷³Sike na gika siknga katakgata tumukuyak. Siwan gata natdetdet nami gikane mama wambae kuutgan natdewit.

⁷⁴Siwan nata natapa aminu gae akgwaukaingu na nanduke waakwau apbaknganingge nataat. Dasingge, na gika wamu yawi kekekakut takngae banip singgat.

⁷⁵Buyambam tapa, na atnataat. Gatane mama wamba noman gan siknga. Sike gata meya nae namukuyau gata asinggan gatangamunangge natake tasikuyak.

⁷⁶Sike nata nataau gata nae musip kwikwik natangamunggayak kakngata musipma tapan kekekanggakge nataat. Dasingge? Wamu gata na puya amin tapakae wa yakuyau atasinggayak.

⁷⁷Gata apmanu nae butaya natangamuyo. Natangami kayuk yutnanga akngana atapit. Dasingge, na gatane mama wamde natapa take siknga singgak.

⁷⁸Sike yamandet aminu kunduta yumdekan nae yawa maiwitde tasingamuking. Unzingge nata nataau aminu waakwau apmaakaningge nataat. Siwan ngana na, na gatane mama wamde asinggan natayuwit.

⁷⁹Aminu gae akgwaukaingkat gatu gatane mama wambae nataaing aminkat nae apa notna notna daknganimde nataat.

⁸⁰Gata gatangami gikane mama wamu siakande siknga tawambitde nataat. Tawamba nanduke aminu kunduta na maakawitde tasiwa maiwikge nataat.

⁸¹Sike na gata tapiakge ganduyuwawa kekekngana tuyuknga gwasik. Ngana na wamu gata yawi kekekakut taknga tawambiyakge banip siknga singgat.

⁸²Na wamu gika yawi kekekakut takngae natake ganduyuwawa kaina toknga nasikaing. Siwan anzing yanggat, “Zaapduknga natane musipma tasiwan wikawik,” ngang yanggat.

⁸³Sike na memetane gupna yangga zikaingu kupan takngata tasiwan bumi siwan mumba kuwa maikaing binga mainggat. Siwan ngana gatane mama wamde dua botanggat.

⁸⁴Tapduu datdasing ganduyuwawit? Siwan zaapduknga gata na puya amindae wai tasikaing aminde meya yake yamuya?

⁸⁵Sike yamandet aminu gatane mama wamba dua tawakaing. Dua tawake ita gapma kundu nata une pimapitde kusopuknga kwaikaing.

⁸⁶Gatane mama wamba kuupbam wa sanga ninda ie banip sinanga taknganin. Siwan ngana aminu kunduta nae kem wam moo siknga yake tasiwan mainggat. Unzingge gata gatangamuyo.

⁸⁷Sike na nutapan kupitde gwa dapakakut. Siwan ngana gatane mama wamba dua tekum.

⁸⁸Gata nae take siknga asinggan natangamunggayak. Siwan gata na katak nanduyuwi na zaat dua kupit. Dua kungwake nata gatane mama wamu kuutgan tawambit.

⁸⁹Buyambam tapa, gatane wamu asinggan asinggan yuwik. Wamu waaknga yekaune kekeknga yuak.

⁹⁰Gata wamu yawi kekekakut taknga asinggan asinggan tawanggayak. Gata kepdaka tangine tekuyak. Siwan waomune unzing yuke dua isakunggak.

⁹¹Mama wamu gata tupa yakuyau apman kaya unzing yuak. Ngan, sanga kuupbamda gikae banip tawakaing.

⁹²Sike nata mama wamu gatane akngae take dua ba natapbum gamu, nata meya takngatu takngatu kakum gwekatangu gwa kupam.

⁹³Nata gatane mama wamba dua pewit. Dasingge, na unin tawamba gata tasiwi na kayuk yuat.

⁹⁴Sike na gikanekan. Unzingge gata na tapso. Gatane wamu asinggan tawanangge tasinggat.

⁹⁵Wai aminu na nutapan kupitde undang kusopuke yuaing. Siwan ngana na gatane mama wambae natapa kuwan nata ie nangaakan dua nataat.

⁹⁶Na apmanu gwa nataat. Sanga take tapatu wena. Siwan ngana gatane mama wamba take siknga. Take akngana kwaapzang siknga. Sangabamu ita gwa yapbikut.

⁹⁷Na gatane mama wamde take siknga nataat. Na ie kwakngaom gatu zikaane ngang ie natanggamatanggat.

⁹⁸Gatane mama wam takngakata tasiwan na natdetdetna bamban sikngaapa dakngake iwanatane natdetdetna ayapbike yuat. Dasingge, wamu waakngaat naat gatake yuamak.

⁹⁹Nata gatane mama wam taknga atawanggat. Siwan wamu wa tawanggat takngata tasiwan na natdetdetna bamban sikngaapa dakngake aminu nanindamukaing amindane natdetdetna ayapbike yuat.

¹⁰⁰Natane natdetdeu kwekngatane natdetdetna gwa yapbikut. Dasingge, na gatane mama wamu noman takngakan tawanggat.

¹⁰¹Sike na kepi waiaknga tawanangge natapit gamu nata asisakuwam. Dasingge, na gatane wam takngakan tawambitde nataat.

¹⁰²Gikane wam taknga gika siknga nanindamukuyak. Unzingge wamu waaknga dua tekum.

¹⁰³Sike iningou genane napanu kaa singgak. Siwan ngana gatane wamu kaa siknga.

¹⁰⁴Gatane mama wambata natdetdeu take namunggak. Unzingge waiaknga kuupbamde asiknga bitanggat.

¹⁰⁵Sike gatane wam taknga lam gwenda binga gatangaman kepi noman sukuwit. Ita kakaa kepiapa yeikngaman kuwit.

¹⁰⁶Sike na gatane wamu noman taknga kuupbam tawambitde gwa yawa kekekakut. Unzingu apme tasiwit.

¹⁰⁷Buyambam tapa, natapso. Na meya buyambam takngata usukwatapbut. Unzingge gika gwa yawi kekekakut taknga tasiwi na kayuk yuwit.

¹⁰⁸Buyambam tapa, nata gae ganimbaknganggat takngae natapi take siyok. Siwan gata mama wamba nanindamumso.

¹⁰⁹Sike na asinggan kumnangge tandakngawa dapaknga singgak. Siwan ngana mama wambae dua botanggat.

¹¹⁰Aminu wai akwau na tanggaganutnangge yapapna kaiwan dandakawan yuaing. Siwan ngana na gatane wam taknga dua tewit.

¹¹¹Na gatane wam taknga dumza siknga asinggan asinggan tanggaganukgat. Sike wamu waakngata tasiwan musip gwaang natake asiknga baknganggat.