Salmo 138:2-8

²Manyakog-ongak ay mansagong sin nasantoan ay Timplom ta idayaw kos sik-a gapo sin layad mo ya kinapodnom, tan inpailam ay nangatongato din karim ya ngadan mo.

³Pinatgam din kararag ko sin nankedawak si badang mo yan indawat mo di toled ya bikas ko.

⁴Awni et dayawen daka si amin ay ari isnan daga, tan din karim yan dinnge da.

⁵Ikanta dan to din inam-amag mo, tan nakaskasdaaw di panakabalin mo.

⁶Ay-ayowanam din nababa, olay mo nangato ka, ngem adi makalisin sik-a din mangipapangato si awak da, olay mo addawi di kad-an da.

⁷Olay mo nanliniked di ligat ko, isalakan mo pay dedan din biyag ko. Omisalakan ka sin bonget di kalaban ko babaen sin panakabalin mo.

⁸Tongpalem amin ay planom paran sak-en, Apo, magay pap-eng din adi manbalbaliw ay layad mo, itoloy mo koma din nilogiam ay oblam, Apo.