Sɑkɑri 5

1

2

3

4

5

6

7

8

9

10

11

12

13

14

¹Sɑkɑri u mɑɑ nɔni seeyɑ kɑ̃siru sɔɔ mɑ u tire kureru gɑru wɑ tɑ yɔ̃ɔwɑ.

²Mɑ Gusunɔn gɔrɑdo u nùn bikiɑ u nɛɛ, mbɑ ɑ wɑɑmɔ mi. Mɑ u nùn wisɑ u nɛɛ, tire kureru gɑrɑ nɑ wɑɑmɔ tɑ yɔ̃ɔwɑ. Ten dɛ̃ɛbu sɑ̃ɑwɑ gɔm soonu yɛndu. Ten yɑsum mɑɑ gɔm soonu wɔkuru.

³Yerɑ u nùn sɔ̃ɔwɑ u nɛɛ, bɔ̃riyɑ tɑ sɔɔwɑ yi yi koo yɑbi tem mɛ kpuro sɔɔ. Ten bee tiɑɔ, bɑ yoruɑwɑ mɑ bɑ koo gbɛnɔbu kpuro girɑ minin di. Bee tiɑɔ mɑɑ bɑ koo be bɑ rɑ bɔ̃ri weesugii ko girɑ.

⁴Gusunɔ wɔllu kɑ tem Yinnin tiiwɑ u koo de bɔ̃ri yi, yi nɑ kpɑ yi gbɛnɔbun yɛnusu di kɑ sere be bɑ rɑ kɑ Yinni Gusunɔn yĩsiru bɔ̃re kɑm. Miyɑ yi koo sinɑ yi yin wɑ̃ɑ yeru ko kpɑ yi ben dirun kpɛɛkpɛɛku kɑ ten kpenu di.

⁵Gusunɔn gɔrɑdo wi, u Sɑkɑri susi mɑ u nɛɛ, ɑ nɔni seeyo ɑ wɑ ye yɑ yɑrim wee.

⁶Mɑ u nùn wisɑ u nɛɛ, mbɑ mi. Mɑ u nɛɛ, birerɑ mi, tɑ yɑrim wee tè sɔɔ tem min tɔmbu kpuron torɑnu yibɑ.

⁷Sɑnɑm mɛ bire ten wukiritiɑ ye bɑ kuɑ kɑ pɛɛrum yɑ wukiɑrɑ, yerɑ u kurɔ goo wɑ u sɔ̃ ten sɔɔwɔ.

⁸Mɑ gɔrɑdo wi, u nɛɛ, kurɔ wi, u sɑ̃ɑwɑ torɑnu. Mɑ u wure u kurɔ wi tɑɑre bire ten sɔɔwɔ, mɑ u wukiri.

⁹Ye u mɑɑ nɔni seeyɑ wɔllɔ, yerɑ u kurɔbu yiru gɑbu wɑ kɑ̃siru sɔɔ. Kurɔ be, bɑ kɑsi mɔ nge kpɑkpɑyɛ, mɑ woo gɑ yi suɑmɔ. Mɑ bɑ nɑ bɑ bire te suɑ bɑ kɑ dɑ wɔllɔ.

¹⁰Mɑ u gɔrɑdo wi bikiɑ u nɛɛ, mɑnɑ bɑ kɑ tu dɔɔ.

¹¹U nùn wisɑ u nɛɛ, bɑ kɑ tu dɔɔwɑ Bɑbilonin temɔ. Miyɑ bɑ koo tu diru bɑniɑ. Bɑ̀ n tu bɑnɑ bɑ kpɑ, kpɑ bire te, tɑ n wɑ̃ɑ mi.