Sekaraia 5

1

2

3

4

5

6

7

8

9

10

11

12

13

14

¹Üa netäsefäl o küna echö toropwe mi äs.

²Iwe, ewe chon läng a aisiniei, “Met ka küna?” Nge ngang üa pälüeni, “Üa küna echö toropwe mi äs, langataman a ükükün ilik fiit, nge chölapan ükükün engol me limu fiit.”

³Mürin, a üreniei, “Iei ewe anümamau epwe feitiu won unusen ewe fanü a mak lon ei toropwe. A mak won ewe epek pwe meinisin mi solä repwe kärila, nge pwal won ewe epek a mak pwe meinisin mi akapelmwäl repwe kärila.

⁴Ewe Samol mi Unusen Manaman a apasa pwe epwe tinato ewe anümamau. Epwe tolong lon imwen ewe chon solä, pwal lon imwen ätewe mi akapelmwäl fän itan. Iwe, epwe nonom lon imwer o ataretiu, epwe ataela ekewe irä me fau.”

⁵Mürin, ewe chon läng mi piin kapas ngeniei a feito o üreniei, “Kopwe netä o nengeni ei mettoch mi feito.”

⁶Nge üa aisini, “Met ei?” Iwe, a pälüeniei, “Iei eu pasikit a aliosunätä än aramasen ewe fanü tipis.”

⁷Iwe, ewe pasikit a wor öppüngün seni pilom. Nge lupwen üa nengeni, ewe öppüng a suk, nge mi wor eman fefin a mot lon ewe pasikit.

⁸Iwe, ewe chon läng a apasa, “Ei fefin a aliosunätä föföringau.” Iwe, a tinalong ewe fefin lon ewe pasikit o apüngätiu won ewe öppüng seni pilom.

⁹Mürin üa netä o küna ruoman fefin ra ässito fän pöükässir ren pöpön asepwäl. Nge pöükässir ra wewe ngeni pöükässin öröpwech. Iwe, ra ekietä ewe pasikit o ässila fan.

¹⁰Mürin üa aisini ewe chon läng mi piin kapas ngeniei, “Ia ra uweela ie ewe pasikit?”

¹¹Iwe, a üreniei, “Ra uweela ngeni ewe fanü Papilon pwe repwe aüetä eu imwenfel fän itan ikenan. Nge lupwen ewe imw epwe wes, repwe anomu ewe pasikit lon lenian.”