Sekaria 5

1

2

3

4

5

6

7

8

9

10

11

12

13

14

¹Io, iau ga idaidok mulai, ma iau ga gigira, ma ea, tika na pinpin na buk i purpururung.

²Ma i ga tir iau: Ava u gire? Ma iau ga bali ia dari: Iau gire ra pinpin na buk i purpururung; ra lolovinana a ilima na pokono, ma ra tababana a ura pokono ma a papar.

³Ma i ga biti tagu: Go ra bilak na varkurai ba na vana rikai ta ra rakarakan a gunagunan par; tago da vamutue vue diat dia loalong papa gori ure, ma da vamutue vue diat dia vavalima vavaongo papa gori ure.

⁴Iau tar tul tar ia ba na vana oai, ra Luluai kai ra lavur kor i biti, ma na ruk ta ra kuba i ra tena nilong, ma ra kuba i nina i vavalima vavaongo ta ra iangigu; ma na kiki ta ra bala na pal, ma na vaimur vue ra umana davai ma ra lavur vat i tana.

⁵Ma ra angelo nina amir ga tata me i ga papangai, ma i ga biti tagu dari: Go una idaidok, ma una gire go ra magit i vana rikai.

⁶Ma iau ga tir ia: Ava nam? Ma i ga biti: A valavalar na kon go nina i vana rikai. I ga biti bula dari: Go kadia kaina mangamangana ta ra gunagunan parika;

⁷(ma di ga tak vue ra tubatuba di ga pait ia ma ra bol,) ma a vavina go, i kiki ta ra bala na valavalar.

⁸Ma i ga biti: A Varpiam go; ma i ga taun tar ia ta ra bala na valavalar, ma i ga tuba bat ia ma nam ra tubatuba na bol.

⁹Namur iau ga idaidok, ma iau ga gigira, ma ea, a ura vavina dir ga vana rikai, ma dir ga bebe ta ra vuvu; ma ra umana bebea i dir dia ga da ra bebea i ra mou; ma dir ga puak vaarike ra valavalar urama ta ra maup.

¹⁰Ma iau ga tir ra angelo nina amir ga tata me dari: Dir puak pa ra valavalar uve?

¹¹Ma i ga biti tagu: Upi da pait ra kuba i ra vavina ta ra gunan Sinar; ma ba di tar vatur ia, da vaki ia tana ta kana kiki iat.