Süleymanin Məsəlləri 25:9-20

⁹Münaqişəni qonşunla özün həll et, Özgənin sirrini açma.

¹⁰Yoxsa hər eşidən sənə xor baxar, Bu səni etibardan salar.

¹¹Yerində deyilən sözlər, Gümüş oymalar içində qızıl almalara bənzər.

¹²Sözəbaxan insana hikmətlinin məzəmməti Qızıl sırğa, qızıl bəzək kimidir.

¹³Biçin zamanı qar kimi sərinlik necədirsə, Etibarlı elçi də onu göndərən üçün belədir. O, ağasının ruhunu təzələyir.

¹⁴Kim ki vermədiyi bəxşişlərlə öyünür, Yağışsız buluda və küləyə bənzəyir.

¹⁵Səbirlə hökmdarı da inandırmaq olar, Şirin dil sümükləri belə, yumşaldar.

¹⁶Bal tapsan, lazımi qədər ye, Acgözlüklə yesən, qusarsan.

¹⁷Qonşunun evinə az-az get, Yoxsa bezər, sənə nifrət edər.

¹⁸Kim ki qonşusuna qarşı yalandan şahidlik edir, Toppuza, qılınca, iti oxa bənzəyir.

¹⁹Dar gündə namərdə bel bağlamaq Çürük dişə, şikəst ayağa güvənməyə bənzəyir.

²⁰Qəlbi qubarlıya nəğmə söyləmək Soyuq havada lüt qoyulmağa, Soda üstə sirkə tökülməyə bənzəyir.