Süleymanin Məsəlləri 23:7-35

⁷O, ürəyində hər şeyin hesabını edər. Dilində sənə «ye, iç» deyər, Amma ürəyi ilə dili bir deyil.

⁸Yediyin loğmanı qusarsan, Dediyin bütün şirin sözlər boşa çıxar.

⁹Axmağın qulağına söz demə, Çünki sənin ağıllı sözlərinə xor baxar.

¹⁰Qədim sərhəd daşının yerini dəyişmə, Yetimlərin əkininə girmə.

¹¹Çünki onların Hamisi qüvvətlidir, Səninlə olan münaqişəyə O baxar.

¹²Qəlbini tərbiyəyə, Qulaqlarını bilik sözlərinə ver.

¹³Uşağa tərbiyə ver, bundan vaz keçmə, Tərbiyə kötəyi ona ölüm gətirməz.

¹⁴Əgər sən onu kötəkləsən, Canını ölülər diyarından xilas edərsən.

¹⁵Oğlum, ürəyin hikmətli olarsa, Mənim də ürəyim sevinər.

¹⁶Dilindən düz sözlər çıxarsa, Könlüm sevincdən cuşa gələr.

¹⁷Ürəyin günahkarlara qibtə etməsin, Ancaq bütün gün Rəbb qorxusu ilə yaşa.

¹⁸Sənin də bir aqibətin var, Ümidin boşa çıxmaz.

¹⁹Oğlum, dinlə, hikmətli ol, Qəlbini düz yola bağla.

²⁰Şərab düşkünü olan əyyaşlara, Ət qapan qarınqululara qoşulma.

²¹Çünki əyyaş və qarınqulu yoxsullaşar, Yeyib-içib, məst olan cır-cındır içində qalar.

²²Doğma atana qulaq as, Qoca anana xor baxma.

²³Həqiqət al, onu satma, Hikməti, tərbiyəni, idrakı qoruyub-saxla.

²⁴Salehin atası bolluca fərəhlənəcək, Hikmətlinin övladı onu sevindirəcək.

²⁵Qoy ata-anan sevinsin, Səni doğan fərəhlənsin.

²⁶Oğlum, ürəyini mənə yönəlt, Gözlərin mənim yollarımı nəzərdən keçirsin.

²⁷Fahişə dərin bir çuxurdur, Yad arvad dar quyudur.

²⁸Quldur kimi pusqu qurar, İnsanlar arasında xainləri artırar.

²⁹Kimdir yaslı? Kimdir dərdli? Kimin münaqişəsi var? Kimin şikayəti var? Kim boş yerə yaralandı? Kimin gözləri qızarar?

³⁰Şərab içməyə oturub qalxmayan, Gedib müxtəlif şərab dadanlar!

³¹Şərabın al rənginə, Qədəhdə parlamasına, rahat içilməsinə baxma.

³²Axırda ilan kimi sancar, Əfi ilan kimi zəhərlər.

³³Gözlərinə qəribə şeylər görünər, Qəlbinə əyri fikirlər gələr.

³⁴Özünü dənizin ortasında sanarsan, Sanki gəmi dirəyinin başında yatmısan.

³⁵Deyərsən: «Məni vurublar, hiss etməmişəm, Məni döyüblər, heç bilməmişəm. Yenə içmək üçün nə zaman ayılacağam?»