Proverbs 23:7-35

⁷mu awuk, nu “Na yu aniso, am noko,” ma se wore, ko manga na yu ko saparam mu ko dogotak sora se kuring guang la ka kuluruwoso.

⁸Se udagi ko ari iki, mu ni inang gotek naem mu awuk kapi waru, ale ka munak ningo ilak munaka lagerem mu awuk ko baluko? Mena.

⁹Kari ngualara mu ka den ningo me manaruko, mu awuk, nu nika ikia sinar yawara ko den mu tauk ale den kolara te bitirukko.

¹⁰Girakala girigir alo ali ko tom beteman umu me baruku ale sarumur, agi kuriang nungumik bitua mena mu nunga ali me iramuruko,

¹¹mu awuk, nunga Bitua Kari bo bagoso tala, mu sokel aora biya; se nunga atumu sanguk ale tawun biya kerak baluko.

¹²Kiti guruga ko den gemang tui ale ikia sinar ko den ko degewa gurugu se lagerko.

¹³Bu te kuriang nukum tagira ko munan mu me to ilupko; memek bitiruk se nukum tagir mu me kuerukko pa!

¹⁴Bu te nukum tagir mu ni kuera mateng ko lage te bataguru toko.

¹⁵Aga namar, ni ikia sinar ago lager, mu ani ni ko ko angamang amilmil ago lagarikko;

¹⁶tom den ningo se diram mu kiring te aratuk mu, ani angamang motam lilim la te amilmilarikko.

¹⁷Ni memek betera alo nunga kiwem memek umu arik ale ko motam welang me tairukko; ni pempem la Yawe bowa ningi la bagerko.

¹⁸Nunguningta, ni uwuta bita lager mu ni tom pempem daiga bagara ningo mu arik ale ningo la lagerko.

¹⁹Aga namar, degewa gurugu ale ikia sinar ago la baga se, munan lage diram mu la karo tui se lagerko.

²⁰Yu aora tawun biya nana ko kari alo, se mel ko nunguning nana ko nodogotak ko talalam, mu nongorak me kapeterko,

²¹mu awuk, nuna anira geraga te nama kituwura amon, ale nungumik mel mena ko baga se guang karur ago se batuwutukam mu nagumonko.

²²Ni ka niet, ka bulamaram, mu ko kuring iki ale ka niam garukaruk ta wore me mel yam ko bitarko.

²³Den nunguning mu mel yawara, se ninguru sail tagi laga to ale ilukuawurko; uwutatala ikia sinar, kiti guruga ningo, se ikia ningo mu koma suanta tala.

²⁴Kari ningo diram mu ko nuet mu amilmil te lagoso.

²⁵Buta se ni ka niamniet nongomang amilmil nungaruko; ka niam mu amilmil biya tuiko.

²⁶Aga namar, aga den ninguru iki ale amolak la karoko,

²⁷mu awuk, lage luan imet mu mutim bo du biya wore toroman, se imet ko kari ilak diram me bagara mu yu ko mutim bo kirikirik se du biya wore iwita.

²⁸Nuna tere kari lage luan te yumuram baga se, imet ilak me diram bagara ko munan te kari suen biya nunga maguwuwoso se kapawasan.

²⁹Awiri ikup ago? Awiri noman bataga ago? Awiri den tagi gurungumu lagoso? Awiri ininga munaka lagoso? Awiri lot gawir ago lagoso? Awiri motam kuagi guar kiriyam lagoso?

³⁰Mu awiriya mena, kari yu aora tawun biya nasan ale yu aora duap duap no ari ari geragasan, kari ari borta.

³¹Yu waen ko diriyam mu agi, bagun ningi musuk pagoso mu se, degetak luan ningi palenga kaposo mu arik ale me motam barasukko!

³²Mu awuk, nukum te mu yu mu mot memek kuating memek karogo wore iwita daongaso.

³³Se motam bingok ale taratarong kelaguk se dora duap duap arik, ale ka ikia ngualaruk se ikia kawel kamin te tairukko.

³⁴Agi ni nimi ko iki mu ni gagi tuagu biya te dal biya bo ko gul te taga anirem ale aniwasam iwita ikiko.

³⁵Ale iwita baluko, “Nuna aninga usagaman bare ani me memek taem! Nuna aninga moman bare ani yaman me ikiem! Se ani amaru te barasik ale yu bo karogo arigek ale naikko ya!” meko.