Süleymanin Məsəlləri 19:3-24

³İnsan öz səfehliyi ilə yolunu alt-üst edər, Ürəyində isə Rəbbə hiddətlənər.

⁴Var-dövlət dost artırar, Kasıbı isə dostları atar.

⁵Yalançı şahid cəzasız qalmaz, Yalandan üzə duran qurtuluş tapmaz.

⁶Çoxları nəcabətlinin üzünü görmək istər, Səxavətli adamla çoxları dostluq edər.

⁷Yoxsuldan qardaşının da zəhləsi gedər, Dostları ondan lap uzaq gəzər, Yalvararaq ardınca düşsə də, yaxınına gəlməz.

⁸Anlayış qazanan öz canını sevər, Dərrakəyə bağlanan uğur qazanar.

⁹Yalançı şahid cəzasız qalmaz, Yalandan üzə duran həlak olar.

¹⁰Axmağa dəbdəbəli həyat yaraşmadığı kimi Qulun ağalara hökm etməsi də yaraşmaz.

¹¹İnsanın ağlı hiddəti ləngidər, Başqasının günahını bağışlamaq ona şərəf gətirər.

¹²Padşahın qəzəbi aslan nərəsinə bənzər, Razılığı çəmənə düşən şehə bənzər.

¹³Axmaq oğul atasına bəla olar, Davakar arvad kəsilməyən damcıya oxşar.

¹⁴İnsana ev, var-dövlət atalardan miras qalar, Ağıllı arvadı isə Rəbb nəsib edər.

¹⁵Tənbəllik insana dərin yuxu gətirər, Avaralıq insanı ac qoyar.

¹⁶Əmrə əməl edən canını saxlar, Yoluna baxmayan həlak olar.

¹⁷Kasıba səxavət göstərən sanki Rəbbə borc verər, Çünki onun əvəzi Rəbdən gələr.

¹⁸Ümid varkən oğluna tərbiyə ver, Ölümünə bais olma.

¹⁹Kəmhövsələ insan cəriməyə düşər, Onu qurtarsan belə, yenə də davam edər.

²⁰Nəsihətə qulaq as, tərbiyəni qəbul et, Bunun nəticəsində hikmətli olarsan.

²¹İnsanın qəlbində çox amalı var, Amma Rəbbin niyyəti həyata keçər.

²²İnsan etibar arzular, Yoxsul adam fırıldaqçıdan yaxşıdır.

²³Rəbb qorxusu insana həyat verər, Ona şər yaxınlaşmaz, tox yatar.

²⁴Tənbəl əlini qabda olana batırar, Ağzına belə, aparmaz.