Rom 3:7-22

⁷Ne lipu titiam tela sanga ba hakhaxi ba, “Nabu haruangagu languangama libu Urana haruangang maxunama tubu, saing alali libu lipudi diti Urana yanoa sabanga, bing baruta Urana sina salaga nanga bila nga lipu kubolu dianam?”

⁸Haruanga olangga li bila haruanga olang tela ba, “Tauna, talibu kubolu diandi bu kubolu xaidi bila lipudi diti Urana yanoa bagula sok!” Lipu teladi daharungiam olang bungina dilangua ba am gatubatuba bila ba. Maring ba daxap Urana suxuyangang salakkama.

⁹Binabu taharua baru? Sanga ba taharua ba am Yudadi am gadali bakbak teladi? Tegu sibuna! Tahatanga masup ba lipu longgalo, am Yudadi xaung Yuda Teguamdi ba, tawa hawa mana kubolu diana.

¹⁰Bila Urana Xuanoa harua ba: “Lipu tela maring te. Tegu sibuna.

¹¹Tela xabianganoa xai te, tela sai mana Urana te.

¹²Lipu longgalo diyamu Urana, ding longgalo taininau, ding diang sibundi, tela libu kubolu xai te, tegu sibuna.”

¹³“Suxunguding haruangadingdi dibuya bila gobagoba xaxaina, manadingdi dituxu murakdi.” “Suxungudingdi daharua xaung haruanga hanggalangia lipudi bila moxa diang baxina.”

¹⁴“Suxungudingdi dibaxagi mana guxam diandi xaung harungiangua.”

¹⁵“Diluki sap ba dung lipudi mati,

¹⁶long baruamta dila mana, dahanggalangia axamandi saing mauxangandi disok la ba,

¹⁷daxabia daxanga gamogamu mosiama te.”

¹⁸“Dimaxuwa monga mana Urana te, tegu sibuna.”

¹⁹Ne taxabia ba haruanga baruamta hanaunaungua harua mana ba, harua na lipu gaxarea duwa hawa mana hanaunaunga ba. Bila balau bu lipu longgalo dimumguti, sanga ba dahaxuya haruanga tela te, xaung bu hatanga ba lipu titiam longgalo mauxangading Urana maxania.

²⁰Baing ina naga, lipu tela sanga ba sok maringina Urana maxania mana kubolua su mana hanaunaungua te. Tegu. Hanaunaungua hatanga nakira rangrang ba talibu kubolu diandi ing ganina.

²¹Ning hatata Urana hatanga daxanganoa mana tasok maringina maxania sok sabasabia ba. Halianga mana hanaunaungua. Ne daxanga ba Moses bung mana bungina bung hanaunaungadi Urana sinadi na, xaung Urana lipuxing suxunguxunguamdi dibung mana xauna.

²²Tasok maringina Urana maxania bungina tahatum haringina mana Yesu Kristo. Urana tongtongia daxanga tela mana Yudadi xaung tela mana Yuda Teguamdi te. Lipu longgalo disu mana daxanga taininau ing ganina.