Louma 3:7-22

⁷Be na wadela:i hou amola Gode Ea hadigi hou, dunu ilia amo gilisili ba:sea, Gode Ea hou da baligili moloidafa ba:mu. Amaiba:le, na da Gode Ea hou eno dunuga ba:ma:ne fidibiba:le, na da abuliba:le wadela:i hamosu dunu ea dabe lama:bela:?

⁸Dunu eno mogili da nama lasogole, Bolo da amane sia:i, ilia da sia:sa, amane, “Hou moloidafa da doaga:ma:ne, wadela:i hou hamomu da defea!” ilia sia:sa. Be amo sia: da ogogosa. Amo adole iasu dunu ilia da se dabe iasu lama:ne, fofada:mu.

⁹Amaiba:le! Dilia adi dawa:bala:? Nini Yu dunu ninia hou, da Dienadaile dunu ilia hou baligibala:? Hame mabu! Na musa: olelei dagoi amane, Yu dunu amola Dienadaile dunu, huluane defele ilia da wadela:i se iasu gasa bagade hou amoga banenesi dagoi.

¹⁰Gode Sia: da agoane dedei diala, “Dunu afae da hou moloidafa hame dawa:.

¹¹Dunu huluane da bagade dawa:su hou hame dawa:. Ilia da Godema nodone sia:ne gadosu hou hame dawa:.

¹²Ilia huluane da Gode Ea hou yolesi dagoi. Ilia huluane da wadela:i hou hamosu. Dunu afae da hou moloidafa hamedafa hamosa.

¹³Ilia da dunu eno bogoma:ne, ogogole sia:nana. Ilia lafidili ogogosu sia: bagade sia: daha. Ougiwane, medoma:ne sia:beba:le, ilia lafi da medosu sania defo hano agoane nabai gala.

¹⁴Ilia da lasogole bagade sia:sa.

¹⁵Ilia da hedolowane se ima:ne gegene, dunu eno medole legesa.

¹⁶Ilia habidili ahoasea, gugunufinisisu fawane ba:sa.

¹⁷Ilia da olofosu hou hamedafa dawa:.

¹⁸Ilia da Godema nodone beda:su hou hamedafa dawa:.”

¹⁹Dunu huluane ilia Sema nabawane hamomusa: sia:i, amo dunuma Sema da hou huluane olelesa, amo ninia dawa:. Be Sema da osobo bagade dunu huluane dafawane wadela:i hou hamoi amo olelema:ne, Sema da dedei dagoi.

²⁰Osobo bagade dunu da Sema huluane nabawane hamoi dagoiba:le, Gode Ea siga ba:ma:ne afadenene moloidafa hamoi, da hamedeidafa. Be dunu huluanedafa ilia da wadela:i hou hamoi dagoi dawa:ma:ne, Sema da dedei diala.

²¹Be wali ninia Gode Ea hou amoga E da dunu E bu noga:i ba:ma:ne afadenesa, amo hou ba:sa. Amo hou da Sema amoga hame hamosa. Be musa: Mousese ea Sema sia: dedei amola balofede (Gode Sia: alofesu dunu) dunu ilia sia: dedei, da amo hobea misunu liligi olelesu.

²²Osobo bagade dunu da Yesu Gelesu Ea hou dafawaneyale dawa:beba:le, lalegagubiba:le fawane, Gode da ilia hou bu moloidafa ba:sa. Gode da Yesu Gelesu dafawaneyale dawa:su dunu, ilima amo hou hamosa.