Guiꞌch par ree bén Rom 3:7-22

⁷Din bal yaguieꞌch ree guial ad rucaagdiajgt xtiidx Dios, laan na̱j ni rüjn yudar xtiidxli Dios din gap bejn laaman mazri respejt, dxel ad zajctri guiëb Dios na̱j bejn béndol.

⁸Abiꞌ mazri ma yaguieen ree ni mal din guiꞌt ni zagdxe, ziꞌc rëb ree bejn culün bejn ree, per Dios gudëëd casti bén rëb ree zian.

⁹Zeel ziꞌc ma rnin por ree bén Israel, në por ree bén ad najt bén Israel, abiꞌ ma ragbeedi guial ad zajct guiëbidi guial mazri benzaꞌc na̱j ree bén Israel guial loj ree bén ad najt bén Israel, din tiblojzi nayajc ree béndol.

¹⁰Ziꞌc ca tiblajt loj xtiidx Dios lod rëb: Achutczi na̱j benzaꞌc, per niꞌqui tijb bejn.

¹¹Achutczi rigniaꞌ. Achutczi raguiil Dios.

¹²Gra reeman ma basaꞌn xnejz Dios. Gra reeman ma zinal nejz mal. Achutczi cayüjn ni zagdxe, per niꞌczi tijb bejn.

¹³Ziꞌcgajczi tijb baa ni zojbyal, zian ganax ni dxuudx ririi roꞌ reeman. Ganax diidx rusquiee rniee reeman. Abiꞌ xtiidx reeman na̱j ziꞌc xvenen bëël.

¹⁴Ganax diidx mal ririi roꞌ reeman, diidxguijdx ni rüjnnaa lasaꞌ reeman.

¹⁵Zaꞌsin reeman din gugüjt reeman bejn.

¹⁶Bantëëz guin zë reeman, rüjn reeman ni dxuudx ree. Abiꞌ rusagzi reeman bejn ree.

¹⁷Ad nünbee tëët reeman xhienaag na̱j guialrbajn bejn zagdxe.

¹⁸Ad yuꞌguijct reeman guial rayal guidxeb reeman Dios.

¹⁹Dunuj ree rayagbee guial gra ni zëëd loj xley Dios, na̱j par ree bén zinal ley guin, chitëë chu guiëb guial achut ragbee xhienin na̱j dol, laan na̱j par gagbee bejn guial najman béndol loj Dios.

²⁰Din ad guial güünt bejn gra ni rniabee ley guin ma nayaman loj Dios, ley guin rulüü din gagbee bejn guial najman béndol.

²¹Per yan Dios ma balüü dunuj ree tijb nejz guial xhienaag yayajc ree naya lojman. Ad guial yaguieentzi ree ziꞌc rniabee ley guin, por ley guin në por ni bacaa ree bén badëë xtiidx Dios loj ree bejn.

²²Rayagbee ree guial rüjn Dios bejn cwent ziꞌc bén ad yuꞌt xtol por guialrliladxaman Jesucrist, din par Dios tiblojzi na̱j bejn.