Romu 3:7-22

⁷La sou no anu xavutala noxou itema la anu uxavutala aloxo ꞌo, “No mine eni asusu la Lataua unoꞌu uala tila, xo no anu susu noxilosi ne la sou ꞌilixo mulapu noxou Lataua ne uxali uatu lamana. Lexe eni eꞌoxonu aloxo ne, ia loxovaa la sou anu uꞌoxo lexe eni amitema sou susu, la sou ulosilo lakolisou susu noxilo ꞌo?”

⁸La sou anu aloxo ꞌo, nenge taꞌoxoꞌoxonu susu mo sou no anu voteꞌi aloxo ne, la sou ꞌilixo laixe uxali. Ta mitema moseꞌi ikalavoisixe, la ivikala lexe no anu aꞌalo noxixe la tevikala aloxo ne. Ta mitema e mivikala aloxo ne, aneꞌi meꞌa inoꞌu tuꞌumaxusou.

⁹La sou nenge tavikala a loxovaa, nenge ta Iutaia temulinu ꞌilixo laixe ia aneꞌi ta mitema vaꞌaxu uasi? Uasisi manina, la sou anu mumaxaꞌu lexe, nenge ta Iutaia mo aneꞌi ta Iutaia uasi, nenge ta mitema sou susu mukalusi.

¹⁰Anu aloxo kaukavu muai no nano no Lavuku Tavuna teinu muvikala aloxo ꞌo, “Itema vile ulapu no iou Lataua uasi,

¹¹mo itema vile lavulavu noxou laixe uasi, mo itema vile ukakamulinu Lataua uasi. Itema vile aloxo ne uasisi manina.

¹²Aneꞌi tavuꞌalo ne milai vaꞌaxu mukalu la sou aneꞌi mukalusi ne mixali ta mitema ta masumasua mukalusi. Vile noxiꞌa ulavusou uꞌoxonu ꞌilixo laixe uasisi manina.”

¹³“Anaxaꞌa ne, muꞌaꞌa loxo lulu anaxu a uxoxolu, mo no anu vaivaikalaiꞌa la ilavusou ikalakalavoi.” “Mo anaxaꞌa ne muꞌanaꞌana no anu vaivaikala sou uꞌoxonu masuanu itema loxo sinana veveeni lexaxu e uꞌoxoneꞌi ta mimii la isoisoli.”

¹⁴“Mo vaivaikala e ulaa no anaxaꞌa ne sou vaikala masumasua xe vaikala sou uꞌoxonu masuaneꞌi ta menexiꞌasi sou ulosiꞌa tuꞌutuꞌumaxusi.”

¹⁵“Mo tavaꞌa uiavelixaꞌa utotomu sou iave ilai iveꞌa ta mitema isoisoli.

¹⁶Xe ilai aloxovaa ne ixalixu mamulosi xe ilosiꞌa aneꞌi moseꞌi tuꞌutuꞌumaxu no anu maulixaꞌasi.

¹⁷Mo ilavusou ꞌilixo sou opo seꞌisisi ꞌo uasi,

¹⁸mo uxali uatu no ieꞌi ne, ilavusou iꞌumolu Lataua uasi.”

¹⁹Vaimomo ꞌo nenge telavusou lexe vaivaikala e lapuloto mulelemolu ne, anu muvivikala noxiꞌa aneꞌi ane mixolu no laaxu lapuloto ne. Aloxo ne, mo sou itema vile umomomo sou uvikala lexe, “Eni amitema laixe,” uasi. Nenge ta mitema tavuꞌalo no lialia mukalusi ꞌo ne, nenge ta mitema sou susu no iou Lataua mukalusi.

²⁰Aloxo ne la sou no anu ꞌilixo sou tamulinu lapuloto, la itema vile umomomo sou uvikala lexe eni elapu no iou Lataua. Uasisi manina. Lapuloto ne anu sou ulosienge sou susu noxinge.

²¹Ia vaimomo ꞌo ꞌilixo e Lataua muꞌoxonu sou mumoxoinge lexe nenge ta mitema telapu no iou Lataua ne a muxali lamana mukalu. Anu uxali no anu voteꞌi sou tamulinu lapuloto uasi, anu muxali no anu voteꞌi vilemo. Vaikala muai no anu lapuloto noxou Mosesi mo lavuku noxiꞌa ta mitema sou palomatana milemolu ꞌilixo maꞌia Lataua muꞌoxonu.

²²ꞌIlixo ne aloxo ꞌo, ta mitema ukalusi e imuxaxu taneꞌi noxou Iesu Kalisito, la Lataua umoxoꞌa lexe aneꞌi ta mitema milapu no iou, ia no anu voteꞌi vile la uasi.