Ɔrɔmu Shiinbii 3:7-22

⁷Ɲyɛ pìi mú sí n‑jà n‑jwo: «Mii kafinare cye kurugo, Kile sèeŋi ká fwor'a yyére u pèente kurugo, lire e, ta mii saha à yaa mii i ɲcû mu à jwo kapimpyiŋɛ?»

⁸Ɲyɛ pìi ká a puru yu, ɲaha na wuu àha n‑jwo na: «Wuu à kapegigii pyi, kacɛnŋkii si nta a fworo cyi e mà yɛ»? Pìi na mii cɛ̂ɛge na mii à yire jwo. Pire sì n‑sìi n‑shwɔ Kile yoge na mɛ.

⁹Di yi ɲyɛ yɛ? Wuu Yahutuubil'à pwɔ́rɔ sùpyire sannte na la? Mà byanhara bá la! Mii à fyânha a li cyêe, Yahutuubii bâra supyishiŋi sanŋi na, pi puni na ɲyɛ kapegigii tugure ɲwɔh'i,

¹⁰bà y'à sémɛ Kile Jwumpe Semɛŋi i na: «Sùpyaŋi wà tufiige ɲyɛ a tíi mɛ, ali shin niŋkin!

¹¹Wà ɲyɛ a sìi yákilifoo mɛ, wà ɲyɛ na Kile caa mɛ!

¹²Pi pun'à kuni niɲcɛnni yaha, pi pun'à pyi kaɲwɔɔ baa. Wà ɲyɛ na kacɛnnɛ pyi mɛ, ali shin niŋkin!

¹³Pi ŋkɔ̀ɔnyi na ɲyɛ mu à jwo fanmugoɲahaga. Pi maha pi ɲjirigii tɛ̀gɛ na pi sanmpii wuruge. Pi ɲwɔshɛɛnr'à pi mu à jwo màcwɔn shɔnrɔ.

¹⁴Laŋaŋke jwumpe ná jwumpimpe kanni pu maha fwore pi ɲwɔyi i.

¹⁵Pi supyibo ton'à wyɛ̀rɛ.

¹⁶Pi maha ŋkɛ̀ɛgɛŋi ná yyefuge yare pi tatoroyi puni i.

¹⁷Pi ɲyɛ a yyeɲiŋke kuni cè mɛ.

¹⁸Pi ɲyɛ a sìi na fyáge Kile na mɛ.»

¹⁹Ɲyɛ yire y'à sémɛ Kile Jwumpe Semɛŋi i Saliyaŋi kyaa na. Wuu s'à cè na wuu Yahutuubil'á y'à sém'a kan, bà li si mpyi sùpya kà tànga ta mɛ, sùpyire puni si ɲcɛ̂ɛgɛ Kile yyahe taan.

²⁰Lire kurugo Kile yyahe taan, sùpyaŋi wà tufiige sì n‑jà n‑tíi Saliyaŋi kurigii ɲaaraŋi cye kurugo mɛ. Nde kanni Saliyaŋi maha jà a pyi ke, lire li ɲyɛ, u maha sùpyaŋi pyi u à kapiini cè.

²¹Ŋka numɛ, pyiŋkanni na wuu si n‑jà n‑tíi Kile yyahe taan ke, Kile à lire cyêe wuu na. Lire ɲyɛ a lwɔ́ a pwɔ Saliyaŋi kurigii ɲaaraŋi na mɛ. Yire Kile tùnntunŋi Musa ná Kile tùnntunmpii sanmpil'à jwo.

²²Kile maha sùpyire pyi shintiilii dániyaŋi cye kurugo Yesu Kirisita na, wà ɲyɛ a wwû w'e mɛ.