Rom 3:7-22

⁷Go pea pare neme makirae agale lagula pe yaalore enaalinumi Gote-na ora agale ria epe-rupa pagaliminalo lagula pe. Go pula pe yaalore ake paa-daa Gote-me ni pupitagi ne ali tea ya?

⁸Go lea-le lamina: Naame koe-au pemare epe au epa alopalia. Enaali medalomame neme apo agale loaayo leme pare makiraeme. Go leme-le kose lape agale tea rabu nimuna koe kedaa mealimi.

⁹Go pea-le naa Juda alinuri ruru radona mudu piruma epe-rupa pima lema? Dia-le Juda page su ruru rado page koe eleme keapea.

¹⁰Gote-na agale le buk madaa agale go-rupa wia: Su kamaa piri enaali raayore redepo le enaali komea-daa napimi.

¹¹Go puma kone makuaae enaali raayo ora komea-daa napimi. Enaali meda Gote aasa pulalo napimi.

¹²Enaali raayome Gote koau waaloma ora pa-rupa piru aaeme. Enaali raayome ora koe-au pu pimi. Ora medame page epe kogono napeme.

¹³Nimumi agale leme rabu tapa-para rogaaemede Ali rona pugu pi-rupa agale leme. Nimumi koe kone suma ora koe makirae agale leme. Nimumi koe agale leme rabu mugununa eke muma leme.

¹⁴Nimuna agaleme koe rero pi agalere lo robaa-para rubitabea.

¹⁵Nimumi alo pumare enaalinu radaa mapaaoma lu makomaalalo peme.

¹⁶Ade abuna pora-nane pameme rabu nimumi ele makoyaaoma koe kedaa kaleme.

¹⁷Nimumi epe-rupa pirape pora na-ademe.

¹⁸Go puma nimumi Gote madaa paalame nakomalimi.

¹⁹Gore Gote-me enaalinu-para nipuna rekena wisade pepa kalisa-pulu go enaalinumi rekena agale mogealiminalo gisa. Go pea-le su kamaa piri enaali raayome Gote-na le agaa madaa pa agale mada na-abuteme. Dia go rekena agaleme enaali raayo Gote-na kose lape agale pagaliminalo maa gisa.

²⁰Gote-na rekena agale mogealia-pulu go aliri Gote-na le agaa madaa redepo le ali-rupa napia. Dia, rekena agalena kogonore ali medame pupitagi nalia-daare maa waatea.

²¹Pare Gote-me enaalinu ma-redepo yaalia rabu go porare ora rekena agalena kogono-daa dia. Moses-me rekena agale lisa rabu page Gote-na agale lakale alinumi agale lakalisimi rabu page nimumi Gote-na ma-redepo le kone madaa lisimi.

²²Enaalinumi Yesu madaa kone rulaeme-pulu Gote-me nimu ma-redepo yaaya.