Rom 3:6-20

⁶Bwe handru en! Buku Kindrei, iy bamwenen bwe, ya barala buku sah ja handru, iy kameh kaleben kandriyen tataha mwan ma badih mari? Iy winiyan bwe, neh?

⁷Ya, buku sahou wasai tek ili aseben iri mwan ma badih nane atanan sahou handru ta Kindrei, ma buku wasai doh bwidi nyaran i tinan labai ja, ya buku sah ja iy aloh jo ndramak ta amekes kandriyen ndra-in, ma iy edeu maha-an eme bwele-ek ta aliy?

⁸Buku sahou doh handru, sebwe taha kasehek ki buku doh ja ai, “Abo, taha kamekes kandriyen ndra-in, tasah kandriyen mwasin kameh winiyan asahan ta lakou doh.” Sebwe kandriyen i buku doh mwasin, nadeh? Bwe handru! Arile, iri lau mwan ma badih rayah anya, “Handru, sahou ta Pol buku baden eh.” Are oro mwan ma badih orou sahou ndra-in buku doh, Kindrei kameh edeu maha-an i la-u oro.

⁹Sendrehendreh ta aliy taha kasehek ki buku sah bah? Sebwe taha lau badu Juwis badeh, are mwasin labai ja tiri lau mwan ma badih rayah ja nadeh? Bwe handru en! Tasah, taha mene ndrasehek, iri Juwis hawe iri lau badu leheleh mari badeh, ado bahandra tondrok ta kandriyen ndra-in mari.

¹⁰Sahou dah handru, i buku none ndratorowenei, “Lau mari badeh, ndra ndra-in le ai, ari mwasin ja bwai;

¹¹Ari ndramak badeh, tanan mwasin udu tan ja bwai, ma hawe ari ndramak batakaleh tekedek ta Kindrei bwai.

¹²Iri mara-ei ndramani san mwasin, ma iri mara-ei ndrasahan lau ndra-in labai. Ari ndramak bamekes se kandriyen mwasin bwai.”

¹³“Boho iri badeh, i buku lek ta lau amak bohon apwa le, tasah iri sihi boho iri ta amekes sahou wasai.” “Iri amekes sahou solo-an labai ta bokoro-ei ndramak ari ja, i buku mada lihi mwak ndra-in ta atoh ndramak imek.”

¹⁴“Boho iri badeh, ndrarahak le aten, ma ndra losen le.”

¹⁵“Kati iri edek suwi anya ta kidi ndramak kimek le;

¹⁶Bolo len mara-ei iri abo gok ta bokoro-ei lakou solo-an, ma adeu maha-an ili tiri mwan ma badih.

¹⁷Iri tana iri kandriyen ta manyah ado le hawe iri lau rayah ja bwe.”

¹⁸“Ma iri banoh se Kindrei bwe.”

¹⁹Ya nadah, taha ndratanan, iri sahou mari, batanau ta Kindrei amekes, idoh badeh, i tiri ado bahandra tondrok ta batanau doh. Eme ma, ari mwan o badih ja winiyan basehek anya, “Jo mwasin mara-ei,” bwe. Taha mwan ma badih badu kon marakon amekes lakou ndra-in i ta mada Kindrei, eme ma batanau tan kameh atehei taha mara-ei a ta mada sahou.

²⁰Tasah, Kindrei atehei batanau tan eme tataha, ta leheya taha ta kandriyen ndra-in tataha i buku sah. Batanau tan le doh, winiyan bamani kandriyen ndra-in tataha bwe. Eme ma, ari ndramak winiyan basahan mwasin ta mada Kindrei na lahou iy amekes in hamon ta batanau malen, bwe.