Romanos 3:6-20

⁶Aypa olâ, aypa lelâlâ! Kewâdyly kulâ aguehomo. Koendonro keba mâkâ-ro watay, xirâ onro anaym aguitobyry modo wâgâ kâpywaniem nitaymba tâise xypyry etay.

⁷Ânguylâ wâne keanra warâ tunâgue: “Uguewâdyly kulâ watay, idani modo aguezemo: ‘Kewâdyly kulâ awâkâ, Deus olâ âkealâ aguely, kewâdyly kulâ waypa. Koendonro Deus’ kezemo. Awylygue tâwâlâ kienokudylymo, Deus wâgâ koendâ aguehomoem. Arâ-ro watay, koendâ inkâba Deus ienagazenehonly uguewâdyly kulâ-ro watay” tâkewâzemo keanra.

⁸Tâlâ keanra: “Inakanhe aguine, Deus koendonro awyly xutuhoem” keim. Âdaunloenlâ arâ aguykewâbyra kine! Tâlâ arâ auguely egaeni modo, âdykâ arâ auguepa olâ urâ. Awârâ wâgâ nhewentâgueni modo âsenagazezemo, enagazedomo keho ara kehoem.

⁹Tâlâ keanra wakeim: “Judeu domodoma judeu keba modo takaze koendonro Deus xurâem?” keim. Aypa olâ! Idânârâ Deus aguehobyry sakanibyryem lelâ kurâ. Aguientoem Deus aguehobyry takaze lelâ kurâ Idânârâ, judeu, judeu keba alelâ.

¹⁰Warâ iwenibyem awyly Deus itaumbyry awo wâgâ: “Idânârâ kurâ xirâ anano modo Deus aguehobyry sakanibyryem lelâ; ânguy âdaitânry lâpeba!

¹¹Ânguy âdy koendonro, inakai warâ awyly xutuim lâpeba kurâ. Ânguy Deus koendâ tiuntudyzedonro lâpeba warâ.

¹²Idânârâ Deus tânanânehonzemo, mâkâ ânwa iozeno imyimbyry xuzatyby ara, arâ lâpylâ idânârâ Deus ize ato tiuntudyzeba awylymo. Ânguy koendonro aieni lâpeba, ipa lelâlâ.

¹³Tâzeguepybyry etadâdyby enahungueduo, inwânry inakanhe kulâ, kywilupanâdâ kehoem, ânguy nhemaenlyemba, myara kehoem aguehomo inakanhe awyly. Tâdâsenogudyly nimopamo. Âgâu kâtobyry inakanhe kyetâ kyiguehoem kehoem, myara aguehomo inakanhe kyedyly.

¹⁴Toenzepa itanrumo iwyku; ânguy izepamo warâ. Awylygue aunlolâ Deusram nhekazezedylymo, izepa tato modo nhenagazenehon-hoem.

¹⁵Tyewiâpadyly-ro watay, inepa kânagazedylymo, kyâlymo warâ.

¹⁶Âdyam idâhomobyrydâ inakai adyesemo. Tuomaruneim modo tuomareba tyenehonzemo; tytynwanânehonzemo inakanhe kyetâmo lelâlâ-ro warâ.

¹⁷Âdaunloenlâ Deus agâ koendâ tadawyly nutubamo, ize ato aiedyly warâ.

¹⁸Deus âwankuem tyesemo, âdy Deus anhekyly tiuntudyzemo inkâba” warâ iwenibyem awyly Deus itaumbyry awo wâgâ.

¹⁹Tutuzelâ kurâ, idânârâ tâzezewenry Moisésram Deus inwenien-hoymby, judeu domodo nheinwântoem awyly. Itaumbyry tâlâ awyly, âdara aguidyse Deus awyly idânârâ kiuntuhoem. Ânguy olâ Deus ize ato aunlolâ anhedyly nipyra. Awylygue judeu, judeu keba alelâ âzenagazeoze Deusram neinwâmpyra atobyry wâgâ.

²⁰Mârâgue tâdâsemaguehoem inkâba myakâwândy Deus tâzezewenry Moisésram inwenien-honly. Mâkâ ize ato ara aguipyra kydawyly kiuntuhoem myakâwândy inwenien-honly.