Rom 3:6-20

⁶Bro Nkifrar kangr ayak gnngtatanm, nhai mrokfom. Inji anatwarnom. Yo tfit kto tur ndar bbinysofthu tuhan yindari bugaroh kotkfot yakitohhirahrm.

⁷Wom Judam duka mirahm, “Nmoh mrokfom kfo fura kfo nhehwatnomm, ee Bro Nkifrar inji htihato rorhu mrokfom kfo yembindthato kfo mifworm. Nom akfo fura duha yinom Bro Nkifrarhu mrokfom nhai kfo yembindthato kfo mifrfotrm. Ndnettn to tamohmpno tfit kfo yamuka, yak gnngtat gnngi-ruhanm?” Inji kfoyuk yimar tu be yima dukef duha yimar inji kfiwur.

⁸Be nd yimarhu mrokfom aptha hik marnyarm, ka kfo marifonom, “To btn nom fasoh fasoh nefm ananom. Inji nakahtnom yimam Bro Nkifrar hifa hti yindhorrahmr.” Wom yimam nanhu yufat yutahato kfo kangm, “Rorn inji wapthakmor.” Inji kfo wokwoma. Tamoh tamoh nefm nd yimam nayukm Bro Nkifrar yak nhombra bugaruharm fasoh tkit yuhatn yak hatohaforahrm.

⁹Nom Judanmoh toh nmbuhati wom yima tangiroh toh nmbuhat Bro Nkifrar finji htitart? Bi kfo hniyanko Judanomi yima tangim rpahtet ruheft korhnom. Rpahtet fasoh nefrpam kuny ki hmbritamnom nd fasoh nefmn hatonitmnom.

¹⁰Bro Nkifrarhu rfa borngt yorhwa mrokfot to kfo kangt, “Nhai wom rpa yimar rorhu yima rifhurio wuthar rhuhato dborioh yimar tohkahr.

¹¹Nhai wom yimar Bro Nkifrarhu dukefrn rhuhato kfo bruttna ba inji nawon o rorpno brbo yi rhuwon inji nakahr. Nhai.

¹²Kmi kmim be tu mong troh twanhiwumr. Nhai ndhtet dborioh dukefm rhukahmm. Nhai wom rpa dborioh net yimar ndar bbinysoft tohkahr.”

¹³“Rroh tngm nnarihayem. Womm yak nnariyefiwatmm fasoh yuham kitwom.”

¹⁴“Womm nhai be tu hifa nyingar hmbrikahmm. Riyakhato kfo rindho borindho thuwomm.”

¹⁵“Kangm, ‘Be asomif womm amtuhaknikahnomm aye nohnomm gobenm kanjo.’

¹⁶Wom fitoh kmim yinyeft wuskapam tamohm riyaka-hukamm kafring bokafring tanyahu-kammn yo tfit wom kmim yinyeft to be rpahtet neft nahukmm. Kmi kmiroh wuska yawonr tamohr be nur krer korhr.

¹⁷Rroh toheft nhai wommpno nayak marnyahato rpat tohkfot. Tu be nhai mif.”

¹⁸“Bro Nkifrar nhai duka yanho mifkahmr.”

¹⁹Nom Judanom bi hti duka tungunewunom, nom nd boririfhuthu yinhit tohwonom. Nhai wom Judar tfit wom yak hhrif mrokfot kfo miruhatr, “Nhai dborioh dukeftpno nd fasoh nefm narmoyanm.” Nhai wom dborioh yimar asha tohkahr. Ndar bbinysofthu tuhan yindars Bro Nkifrarpno bi mrokfet bugayetem.

²⁰Ndnettn nhai boririfhu mrokforoh hikneftn Bro Nkifrar yukatohhato yima yuhum yak wuskahrnom. Nhai. Nom niwa nefm nd boririfhutn yak nuhas kangtnom ndt fasoh nefet.