ROMANOS 3:6-20

⁶Kjá náhí. A̱ ntá tí jehya ijnko nkexro jína tí jehe chꞌán, ¿ntá nkexrí chrókjuinchekito̱exín chꞌán iji̱é chojni chjasintajni?

⁷A̱ ntá tí chrókjuínki̱tsa tí kjuachꞌia kuènta̱na kíxin chrókónoaxínrá tí nkehe chaxín kuènte Dios, ¿a̱ ntá nkekuènté tsꞌékaráni jie̱ kíxin janhan mé ijnko chojni chónta jie̱?

⁸Tí xi̱kaha la, ¿á chrókjuichꞌeni tí nkehe jínahya kíxin ntá chrókui tí nkehe jína? Mé xi̱kaha ichro iso chojni tꞌekani jie̱ kíxin xi̱kaha tjakoni, ichro sín. Tí sín a chrókjuasóte sín kíxin xi̱kaha ichro sín.

⁹¿Ntá nkexrí? Jeheni judíoni la, ¿á a̱ntsí má tjetoanni, a̱ ntá tí sín í so la, á náhí? Kjá náhí. Kíxin kaín ni chojni judíoni la ko tí sín jehya judío mé kaín ni kjuínchexiteyéhe̱ni tí jie̱ kjuasinni.

¹⁰Ntáchro tí xroon itén Dios kíxin: Kohya ninkexró chrókjuichꞌe tí nkehe jína, la kohya nijnko chojni.

¹¹Kohya ninkexró tienxín, Kohya ninkexró chrókjueyá Dios.

¹²Kaín chojni kꞌuékꞌaji sín tí nti̱a jínahya la ko kaín chojni jnkokón kꞌuáji sín ntoáhya, kohya ninkexró chrókjuichꞌe tí nkehe jína la kohya nijnko chojni.

¹³Tí isin chojni la éxí tòye̱ tsíxrankehe tsíxravá chojni kíxin tí nejen chojni chꞌiyaxín. La tí veneno kuènte konche chónta irꞌva chojni.

¹⁴Tí irꞌva chojni tsíkaón nkehe jínahya la ko kjuanínkaon.

¹⁵Xritinká sín kíxin tjinkaon sín chrókꞌóyán sín chojni.

¹⁶Tí nti̱a kꞌuáji sín tió xi̱kaha kjuíchꞌe sín mé kjuínchekꞌitjáyan sín kaín kjuaxróxin kꞌuéchónta ókjé chojni.

¹⁷Chónhya sín tí nti̱a tjanjon kjuaxróxin

¹⁸kíxin kjuenka̱yáxinhya sín chróchrako̱nhe̱n sín Dios. Mé xi̱kaha ntáchro itén Dios.

¹⁹Ó noheni kíxin kaín tí nkehe nixja tí xroon chónta tí ley mé kꞌue̱tue̱nhen kaín tí sín tinkáchónki tí ley kíxin ntá kaín chojni chjasintajni chrótání sín kíxin kaín chojni tsjasóte kíxin Dios mé sinchekito̱exín iji̱é kaín chojni.

²⁰Kíxin ninkexró chrókjuacha chrókótjuáxin iji̱é sín kíxin chrókjuinchexiteyéhe̱ sín tí nkehe tꞌe̱to̱an tí ley. Tí ley la jehó chꞌe xra̱ tso̱noexínni kíxin chóntani jie̱.