Romanos 3:6-20

⁶¡Manan saynachu! Sichus Dios mana justo kaspari, ¿imaynataq juzganman culpayoqchus icha mana culpayoqchus kasqankutarí?

⁷Ichaqa huchayoq runakunaqa ninkumanmi khaynata: “Noqayku tukuy llullakuykunapi kawsasqaykuraykun, runakunaqa aswan mastaraq cheqaq Diosta alabashanku. Chayri, ¿imanaqtintaq noqaykutari huchasapa runakunata hina Diosri juzgawankuman aswan noqaykupa ruwasqaykuwan Dios hatunchasqa kashaqtinrí?” nispanku. (Chay huchasapa llullakuq runakunapa khayna piensasqankuqa manan allinchu. Diostaqa runakunaqa alabanku cheqaq kaqta rimaq Dios kasqanta yachasqankuraykun, manan runakunapa hucha ruwasqankuwanchu).

⁸Sayna kaqtinri, ¿manachu huchakunata aswan ruwasunman, allin kaqkuna hamunanpaq? Ichaqa saynata rimaspankun wakin runakunaqa noqa Pablota acusawanku: Pabloqa yachachishan: “huchakunata aswan ruwasun, allin kaqkuna hamunanpaq”, nispanku. Saynataqa rimanku noqata malpi qepachiwanankupaqmi. Ichaqa saynata llullakuspa yachachiqkunataqa, Diosmi, justiciata ruwaspa, anchata castiganqa.

⁹Saynaqa, ¿ima niwaqchistaq kaykuna nisqaymantarí? Qankunari, ¿piensankichishchu kay Israel nación llaqtayoq runakunamanta, huk law nación llaqtayoq runakuna aswan más huchayoq kanankupaq? ¡Manan chayqa saynachu! Ñan niykichishña, Israel nación llaqtayoq runakunapas, hinallataq huk law nación llaqtayoq runakunapas, llapallanchismi Diospa ñawpaqninpiqa huchayoq kanchis.

¹⁰Chaymantan Bibliapi khaynata nishan: “Manan ni pipas justo runaqa kanchu. Manapunin ni ch'ulla runallapas mana huchayoqqa kanchu.

¹¹Manan ni pipas Diospa yachachisqanta entiendeq runaqa kanchu. Manataqmi ni ch'ulla runallapas Diosta mashkaqqa kanchu.

¹²Llapallanmi kay pachapi runakunaqa, huchapi kashanku. Hinaspan llapallanku, huchapi kawsaspanku, Diosmanta karunchasqa kashanku. Manan ni pipas allin kaqta ruwaq runaqa kanchu. Manapunin ni ch'ulla runallapas allin kaqta ruwaqqa kanchu Salmos 14.1-3.

¹³Siminkupas asnaq sepultura hinan tukuy tiempo kichalayashan. Paykunaqa llullakuspankun engañanku. Paykunapa siminkumantaqa, mach'aqwaypa venenon hinaraqmi rimasqankuqa lloqsimun.

¹⁴Paykunapa rimayninkuqa, runamasinkuta maldeciyllan. Paykunaqa qaso simi kaspankun, k'araqllatapuni rimashanku Salmos 10.7.

¹⁵Paykunaqa runamasinkuta wañuchinankupaqmi, listollaña kashanku.

¹⁶Paykunaqa waqay llakikuytan, ñak'ariytawan ima mayman rispankupas saqetamunku.

¹⁷Paykunaqa hawkalla kawsaytaqa manan yachankuchu Isaías 59.7-8.

¹⁸Paykunaqa manan Diostaqa manchakunkuchu, nitaqmi respetankupashchu”, nispa Salmos 36.1.

¹⁹Kunanqa yachanchismi, Moisespa escribisqan leykunaqa, runakuna chay leykunata kasukuspa kawsananpaq escribisqa kasqanta. Ichaqa manataqmi ni pipas llapallan chay leykunata kasuytaqa atirankuchu. Chaymi llapallan runakunaqa, Diospa ñawpaqninpi upallaspanku, huchayoq kasqankuta yachakunqaku.

²⁰Chayraykun Moisespa llapallan escribisqan leykunata mana cumplisqankurayku, mana ni pipas kikillankutaqa salvakuyta atinkumanchu. Aswanmi Moisespa escribisqan leykunaqa, huchayoq kasqanchista reqsikunanchispaq qosqa karan.