Roma 3:6-20

⁶Kabay ani mangu, là fakay ku manito là matlu Dwata, du ku laan matlu, tan i kiboan mukum i kdee dad to di fulé duh?

⁷Na ken nun to man, “Ku fagu di ktulengu kéng, baling mbangal kite dad to i katlu Dwata, na én i gumdàla dmayen i kdatah Dwata, kan ku nukuman agu salngad i to gamsalà?” Ani i gman dad to là fulung faldam.

⁸Na nun dad to mangman, agu kun tamdò gambet ani gine, bay là sa, du én i tdòla fakay ito mimò sasè ku nun fye gukelan. I dad to tamdò ani, fanlayam Dwata na too tlu kukuman dale.

⁹Na gito dad Dyu, man nawayu i kagkahito fye fa di dad to ise Dyu, bay là sa. Tagatdògu di gamu kdee dad to balù Dyu ku demen ise Dyu slame mgikat di salà.

¹⁰Du nun man di Tnalù Dwata tafsulatan, manan, “Landè to matlu di kite Dwata, balù satu.

¹¹Landè to gamlabat i kaglut, na landè to too mngabal Dwata.

¹²I kdee to tatlas ale di glut dalan, kdeela kulang i nimòla, landè di dale mimò fye, balù satu landè.”

¹³“I bàla gambet sol i lbang là maglimun, fagu di kafdagla ftatekla i demela to.” “Na i dad manla, too tamduk gambet alas i ulad.”

¹⁴“Fnò i dad bàla dad féét flagi.”

¹⁵“Na too ale mlal manò.

¹⁶Na gal ale smamuk i demela to, na falmola i dengegla.

¹⁷Na landè gadèla gablà di ktanak nawa.”

¹⁸“Na là ale fulung likò di Dwata.”

¹⁹Na gadeito i gman di flalò Dwata, gmanan di dad to mlalò i flalò. Na fagu di gman Dwata, gadeito landè to fakay mangman, kenen i là fakay fanlayam Dwata, du kdee dad to slame tagamsalà di kenen.

²⁰Du landè to mbaling matlu di kite Dwata fagu di kimenan i flalò blé Dwata fagu di ku Mosis, du galan nlafà. Én gukmamu i flalò, dunan fdilean di dad to i kagsalàla du galla nlafà.