Romanos 3:6-20

⁶Pero hahixøøby jaduhṉ coo jaꞌa Dios hajxy xyajcumädóow̱ämät. Haa caꞌa, coo jaꞌa Dios häxøpy hoy quiaꞌa hity, cabä cuhdujt häxøpy miøødä coo hajxy jaduhṉ xyajcumädóow̱ämät.

⁷Hoyyä jäyaꞌayhajxy näjeꞌe jia mänaꞌañ cooc tyijy jaꞌa Dios quiaꞌa yajtøjiaty waam̱baty tøø quiapxy tøø miädiaꞌagy, yajnajuøøby jaduhṉ coo jaꞌa Dios tøyhajt mänaa quiaꞌa høhṉdaꞌagy. Jaduhṉä jäyaꞌayhajxy nägøx̱iä ñajuøꞌøwaꞌañ coo jaduhṉ yhahixøꞌøy coo jaꞌa Dios hajxy nwiingudsähgǿøyyämät. Pero coo pøṉä Dios jaduhṉ ñänǿmät cooc tyijy quiaꞌa yajtøjiaty waam̱baty tøø quiapxy tøø miädiaꞌagy, hahixøøby jaduhṉ coo jeꞌe quiumädów̱ät.

⁸Näjeꞌec̈hä jäyaꞌayhajxy xñähøønøꞌøy cóogøch tyijy nmänaꞌañ cooc tyijy jaduhṉ yhahixøꞌøy coo hajxy haxøøg njatcǿøyyämät, jadúhṉäc tyijy maas hoy quiähxøꞌøgaꞌañ coo jaꞌa Dios jiaanc̈h tehm̱ yhoyyä. Jaꞌa hänáꞌc‑høch hajxy jaduhṉ xñähøønøøbiä, høhṉdaacp hajxy jaduhṉ. Hahixøøby jaduhṉ coo hajxy quiumädów̱ät.

⁹Jaanä jaduhṉ højts judíospä, cab højtsä Diosmädiaꞌagy maas hoy ngudiuṉ̃ quejee jaꞌa hänaꞌc‑hajxy caꞌa judíospä. Haa caꞌa, tøøc̈h nhuuc mänaam̱bä coo hajxy jaduhṉ hoy ngaꞌa näꞌägä hojiäyaꞌayhájtäm, coo ni pøṉä Diosmädiaꞌagy hoy quiaꞌa näꞌägä cudiuṉ̃, ni højts judíos, ni jaꞌa hänaꞌc‑hajxy caꞌa judíospä. Hamdsoojoot hajxy jaduhṉ hoy ngaꞌa jäyaꞌayhájtäm.

¹⁰Jaduhṉ jim̱ myiṉ̃ cujaay maa jaꞌa Diosmädiaꞌaguiän: Ni pøṉ hoy quiaꞌa wädity.

¹¹Ni pøṉ jaduhṉ quiaꞌa wiinjuøꞌøwaꞌañ nebiä Dios wyiinmahñdyhatiän. Ni pøṉä jioot quiaꞌa pädaꞌagy maa jaꞌa Diosän.

¹²Tøø jaꞌa jäyaꞌayä Diosmädiaꞌagy hajxy nägøx̱iä ñajtshixøøñä. Cøjnøø cøjtuꞌu hajxy tøø piaduꞌubøjnä. Haxøøg hajxy jiäyaꞌayhajnä nägøx̱iä.

¹³Jaanc̈h tehm̱ yhaxøøg hajxy quiapxy miädiaꞌagy. Jaduhṉä yhaawhajxy tiocxuugy nebiä hoꞌoguiäyaꞌajiut tiocxuuguiän, jaꞌa tøø yhawáꞌac̈häbä. Jaanc̈h tehm̱ yhøhṉdaacp hajxy. Jaduhṉä haxøøgpä hajxy yaghity yhaawjooty nebiä haxøøgtsahṉ̃dyhaawän. Jaanc̈h tehm̱ miägapxpojp hajxy.

¹⁴Jaanc̈h tehm̱ quiapxtägooby hajxy hoñejpiä nebiä jioot hajxy yajmädsoquiän. Jaanc̈h tehm̱ yhaxøøg hajxy ñiñänømyii.

¹⁵Jaanc̈h tehm̱ piaquiä jootmaꞌad hajxy piaadyii, mänitä miäyaꞌadiøjc hajxy nøcxy yaghoꞌogaꞌañ.

¹⁶Jaanc̈h tehm̱ chipyajpädøꞌp hajxy majaty hajxy wiädity. Chaac̈htiuum̱biä cuꞌug hajxy jaduhṉ.

¹⁷Jaanc̈h tehm̱ chiptsojp hajxy.

¹⁸Cab hajxy tiajy miay pø yajcumädow̱áaṉäbä Dios hajxy.

¹⁹Jaduhṉds jeꞌe, yajcumädow̱aam̱biä Dios jaꞌa jäyaꞌay nägøx̱iä, pøṉä miädiaꞌagy hoy caꞌa cudiúuṉäp, møød højts judíos, møødä hänaꞌc‑hajxy caꞌa judíospä. Højts judíos, højtsä pojpä nmaas møød, jeꞌeguiøxpä coo højtsä Dios jaꞌa nhapä ndeedy jecy xjia hanehm̱ä coo hajxy haxøøgjaty quiaꞌa jatcǿꞌøwät nébiøch naam̱nä tøø ngujaayän. Pero cab højts jaduhṉ nnäꞌägädä cudiunaꞌañ.

²⁰Jéquiänä Dios jaꞌa Moisés yhanehm̱y coo jaꞌa miädiaꞌagy quiujáhyyäxät. Jaduhṉ hajxy nnajuǿøyyäm coo hajxy nägøx̱iä hoy ngaꞌa jäyaꞌayhájtäm. Ni pøṉ jaduhṉ hoy quiaꞌa cudiunaꞌañ jaꞌa Diosmädiaꞌagy. Coo jaꞌa Jesucristo hajxy tøø xñähhoꞌtúutäm, paadiä Dios hajxy xpiädaꞌagáaṉäm hawaꞌadstuum, caj jieꞌeguiøxpä cooc tyijy jaꞌa mädiaꞌagy hajxy hoy ngudiúuṉäm, jaꞌa Moisés jecy quiujáhyyäbä.