Romɨ 3:6-20

⁶Sasarebwi arɨkewɨnyɨ. Gotɨyai yɨdaꞌmaraangebwi mya yajɨ kwajɨ Kwaaka davakɨyaraavɨ sasara myai gara yawɨrannelaka!

⁷Sareꞌ dareꞌnesɨ. Pwara dara dɨna “Nɨmɨre kwaasɨ yagaala saꞌ Gotɨyare yagaala nebulyaꞌnanyaꞌ kuꞌmaayaba marimaꞌnaabathesɨ. Yɨ dazaꞌ sara yojɨ gamɨnne yayaꞌ munyaba makɨladesɨ. Sareꞌna gaꞌdareburɨ nyɨdɨvanɨꞌ? ‘Gɨmɨ waginakeigɨnyɨra.’ Sara jɨdavaka nɨmɨnyɨ daanga nyɨjaavanɨkeꞌ beꞌneka?”

⁸Sara dɨpɨjaꞌ sarevɨdaaꞌnyɨ kwaasɨ yawɨta dara dɨpɨꞌdeꞌnanyɨ “Yarala, nemɨ kayaaꞌnanya sabwi yaana! Yɨ savɨ tewaanya sabwi yɨmaꞌnadeꞌna kayaaꞌnanya sara yaana!” Nabaai sasare sabwi nawɨꞌnyaꞌ daa! Aꞌmwera pwara nemɨnyɨna bɨraiyagaala kwaasɨ dara nedɨvanɨgaꞌ “Yagaala Kɨraazɨtɨyareraavɨreꞌ yɨ sasaresɨ.” Sasareraavɨ Gotɨyai daanga wɨjaavadelyɨ. Nabaai tɨvɨkɨta saꞌ yɨdasasɨ.

⁹Yɨ gathaꞌdarevɨnaka! Nemɨ Juyaina aꞌmwe pwaraavɨ wavɨlavaanneina dɨngaka! Aawa nebulyasɨ. Sareꞌ dareꞌnesɨ. Nemɨ jɨdasaꞌna tɨviꞌna dɨwo “Yɨ yuyaina wagɨlyavɨ kwaakewɨ mwaaihoinera Juyainajɨ Anga Pimagɨnya (Gɨrikɨya) kwarajɨ.”

¹⁰Sabaaibɨꞌ dara dɨnɨkesɨ. Gotɨyaryaba yɨdaꞌmaraanga aane pwai kwai mɨꞌ. Arɨkewɨnyɨ. Aane pwai kwai mamwaalyɨꞌ.

¹¹Aꞌmwe pwai sɨmunya wɨwarɨkei mɨꞌ. Gotɨyarɨna pwai bɨrɨbɨrya yɨvanɨkei mɨꞌ.

¹²Yɨ yuyara Gotɨyarɨ yagalyaꞌmaꞌmwaasare. Yuyara yɨrakureva waryaanyara yɨmaꞌnɨwaasare. Nawɨꞌnyabwi yade aane pwai mɨꞌ. Sasarei aane pwai kwai mamwaalyɨꞌ.

¹³Taalɨsavɨdaaꞌnyɨ gɨlebutɨrɨnyaꞌbɨꞌ newinɨvanɨka wɨdadɨvɨsare. Taalɨsasɨ kwaasɨ yagaala wɨdadɨvɨsare. Naawɨnaanyare kwaamɨnyaꞌ aꞌmweraavɨ tamakadevaaibɨꞌ Yagaala nabinabinya kayaaka yɨgalyaꞌne wɨdadɨvɨsare.

¹⁴Aꞌmweraavɨ kayaaka dɨragɨnna yɨgalyaꞌne Yagaala kayaaꞌnanyanna paasiyagaala wɨdadɨvɨsare.

¹⁵Yɨhukaannakera aꞌmwe tamyaꞌnera Yarai kaanyaveꞌna yamaryadɨvɨsare.

¹⁶Kayaaka yɨgalakyaꞌnera wɨna yadɨvɨꞌ Taanginya kwalaalya wɨjaayaꞌnera wodɨvɨsare.

¹⁷Kwaamuꞌnanyaburɨne tusaꞌ yawɨramaaꞌdɨvɨtara mɨꞌ. Pwarajɨ avaaizɨmunyabwi yeꞌmwannamwaaidɨvɨtara mɨꞌ.

¹⁸“Gotɨyai Naangelyɨra,” myawɨri yadɨvɨꞌ Kumɨre tɨnnyaraavɨ Gotɨyarɨne lɨkebwi mwarika. Gotɨyare bukuyavɨ sara dɨnɨkengɨ.

¹⁹Nabaai sara dɨnɨkenna nemɨ yawɨꞌmwo. Yuya Kɨwɨnya dɨnɨke nemɨ Juyaina saburɨ dalaangewɨ wɨlaꞌnata yɨgoina sara yaꞌne dɨnɨkengɨ. Sareꞌ kɨrɨꞌ Juyainaavɨna dazabwi yɨhɨthɨwebwi yɨwetawakya warɨkesɨ. Sarevɨdaasɨ Gotɨyai yawɨbwataꞌnegaaꞌ nemɨrebwina “Juyarajɨ maanga bɨpaina yɨpɨka! Nabaai aꞌmwe yuyawɨnyara nɨmɨnyɨna yɨwetawakya sabwi kɨnɨnnakera mwaaibɨka!” daka Kɨwɨnya kɨnɨnnakeinaavɨ dalaangewɨ nemarulawakakeine.

²⁰Sareꞌna darevɨnyɨ. Gotɨyare yawɨbwataꞌnebwina Kɨwɨnya sabwi mɨdɨnyavɨna “Aꞌmwe yɨdaꞌmaraangeigɨnyɨ. Nɨmɨreigɨnyɨ,” Gotɨyai kɨlaaꞌnaka aane pwarɨ kwarɨ wɨdatheꞌ mɨꞌ. Aawa. Sareꞌ dareꞌnanyɨ. Kɨwɨnya sabwi nemɨre wagɨla saburɨ yuneꞌna neyɨbwarɨdaakuvanɨkesɨ sahɨrɨꞌna.