Romans 3:6-20

⁶Nomo. God im oldei rait, dumaji if im nomo rait, wal im kaan jadjim ebribodi langa dijan wel.

⁷Yumob sabi? Maitbi sambodi garra tok, “Wen mi dalimbat laiyawan stori, maitbi det laiyawan stori garra meigim pipul sabi det trubala stori blanga God brabliwei, en afta detlot pipul garra preisimbat God brabliwei. Wal if det laiyawan stori meigim det ting hepin lagijat, wal wotfo God garra stil panishim mi laiga nogudbala men blanga det laiyawan stori?”

⁸Yu si? If enibodi tok lagijat, wal im reken God kaan panishim im blanga detkain nogudbala ting, en im garra go en dalim ola pipul lagijat. Im garra tok, “Yumob garra dum nogudbala ting blanga meigim gudbala ting hepin.” Wal ai dalim yumob. Sambala pipul bin spredimat laiyawan wed blanga mi blanga diskain ting. Dei reken mi dalimbat pipul blanga dum nogudbala ting blanga meigim gudbala ting hepin. Bat nomo. God garra panishim detkain pipul blanga detkain nogudbala ting weya dei dumbat, en God im rait blanga panishim olabat.

⁹Yumob bin irrim mi tok. Wal wanim yumob reken? Melabat Juwish pipul mobeda langa ola Jintail pipul? Nomo. Melabat nomo mobeda langa Jintail pipul, dumaji aibin shoum yumob ola Juwish pipul en ola Jintail pipul olabat ol jidan jis laiga prisana blanga det nogudbalawei.

¹⁰Wi sabi tharran deya, dumaji langa oltestaman im tok, “Nobodi gudbala. Nomo enibodi.

¹¹En nobodi sabi brabliwei du. Nobodi oldei jinggabat God.

¹²Ebribodi bin tenawei brom im, en deibin ol go nogudwei, en nobodi oldei dum gudbala ting.

¹³Dei oldei tok olkain laiyawan wed, en detlot wed weya kamat brom olabat mawus im jis laik det poisin brom jigiwan sneik, en wen dei opinim olabat mawus en tok detlot wed, dei oldei ardimbat pipul.

¹⁴Dei heidim pipul, en dei oldei sweyasweya langa olabat.

¹⁵Dei nomo weistim taim blanga ardim en kilim enibodi,

¹⁶en wen dei oldei go eniweya, dei oldei gibit trabul en meigim ebrijing nogud.

¹⁷Dei nomo sabi hau blanga jidan gudwei en meigim enibodi gudbinji,

¹⁸en dei nomo bradin blanga God du.” Lagijat na im tok langa oltestaman blanga ebribodi.

¹⁹Wal ebrijing weya det lowa tok, wi sabi im tok langa detlot pipul hu bulurrum det lowa, en det lowa im deya blanga meigim detlot pipul sabi weya dei rong en dei kaan tok enijing,

²⁰en det lowa im deya blanga meigim ebribodi sabi God garra jadjim olabat, dumaji nobodi kaan jidan raitwei langa God brom dumbat wanim det lowa tok. Nomo. Det lowa kaan meigim enibodi jidan raitwei langa God. Det lowa meigim wi sabi wi ol dumbat nogudbala ting.