1Mürin üa küna eu läng mi fö me eu fanüfan mi fö, pun ewe poputän läng me ewe poputän fanüfan ra morola, nge matau esap chüen wor.
2Iwe, üa küna ewe Telinimw mi Pin, ewe Jerusalem mi fö, a feitiu me läng seni Kot, a molotä usun eman fin apwüpwülü söfö a tolong lon foutan pwe epwe apwüpwülü ngeni pwülüan.
3Iwe, üa rong mwelien eman mi leüömong a kapasowu seni ewe lenien motun king, “Nengeni, imwen Kot a nom lein aramas! Iwe, Kot epwe nonom lefiler o ir repwe aramasan, nge püsin Kot epwe etiir pwe epwe ar Kot.
4Epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.”
5Mürin ewe mi mot won ewe lenien motun king a apasa, “Nengeni, üpwe asöfösefäli mettoch meinisin.” A pwal üreniei, “Kopwe makkeetiu ekei kapas, pun ra let o allükülük.”
6Iwe, a apasa, “Mettoch meinisin ra fisila iei. Ngang ewe Aemanün me Amüchülan, ewe Popun me ewe Sopolan. Üpwe ngeni chokewe mi kaka pwe repwe ün seni ewe puächen kolukun manau, nge resap möni.
7Iö mi pwora ngeni mine a ngau epwe feiöchüni ekewe feiöch meinisin. Iwe, ngang üpwe an Kot, nge i epwe nei.
8Nge ekewe chon niuoken me chon lükümang, ekewe chon limengau me chon niela aramas, ekewe chon lisowu me chon angangen rong, ekewe chon angang ngeni anümwäl me chon chofona meinisin repwe nom lon ewe noom mi pulopul ren ekkei me primston, iei ewe aruen mäla.”
9Mürin eman me lein ekewe füman chon läng mi fen wor rer ekewe fisu sepi mi ur ren ekewe fisu amüchülan feiengau a feito rei o a apasa, “Kopwe etto pwe üpwe aküna ngonuk ewe Fin apwüpwülü söfö, iei i pwülüen ewe Lam.”
10Iwe, lupwen ai nom lon ngün, ewe chon läng a uweieila won ungen eu chuk mi fokun tekia o a aküna ngeniei Jerusalem, ewe Telinimw mi Pin, a feitiu me läng seni Kot,
11a saramaram ren än Kot we ling. Ewe telinimw a tittin usun eföü fau aüchea itan jasper, a kurufat usun ewe fau itan kristal.
12A wor eu tit mi pöchökül o tekia pwelin ünükün ewe telinimw, a pwal wor engol me ruu asamalapan, nge engol me ruoman chon läng ra mamasa ekewe asam. Iwe, won eu me eu ekei asamalap a mak iten eu me eu ekewe engol me ruu ainangen aramasen Israel.
13A wor ülüngat asamalap won eu me eu pekin: ülüngat me peliötiu, ülüngat me peliör, ülüngat me peliefeng pwal ülüngat me pelilotou.
14Tittin ewe telinimw a kaütä won engol me ruoföü föün longolong, nge won ekei fau a mak iten nöün ewe Lam kewe engol me ruoman soukünö.
15Iwe, ewe chon läng mi kapas ngeniei a amwöchü efoch wokun aükük mi för seni kolt, pwe epwe aükü ewe telinimw, asamalapan me tittin.
16Ewe telinimw a nönnöpök chölapan me langataman. Iwe, ewe chon läng a aükü ewe telinimw ren ewe wokun aükük, nge a pwä pwe ükükün langataman engol me ruungeröü stadia, nge chölapan me tekian ra usun chök langataman.
17Ewe chon läng a pwal aükü ewe tit, iwe, a pwä pwe ükükün ipükü faik me rüanü cubits. An ei aükük a longolong won ewe aükük aramas ra aea le aükük.
18Ewe tit a för seni ewe fau aüchea itan jasper, nge ewe telinimw a för seni kolt mi fokun mürina, a kurufat usun kilas.
19Ekewe föün longolongun tittin ewe telinimw ra aling ngeni sokopaten fau aüchea. Ewe eföün longolong ewe fau aüchea itan jasper, ewe aruoföün safaia, ewe aülüföün akit, ewe aföföün emeralt,
20ewe alimeföün oniks, ewe awonoföün karnelian, ewe afüföün krisolait, ewe awaluföün peril, ewe atiweföün topas, ewe aengolunföün kalsetoni, ewe engol me eföün jasint, nge ewe engol me ruoföün ametist.
21Ekewe engol me ruu asamalap ra för seni engol me ruoföü föün pwei, eu me eu kewe asamalap a för seni eföü chök föün pwei. Nge alen ewe telinimw a för seni kolt mi fokun mürina, a kurufat usun kilas.
22Nge üsap küna eu imwenfel me lon ewe telinimw, pun imwenfelin lon iei ewe Samol Kot mi Unusen Manaman me ewe Lam.
23Esap lomot ngeni ewe telinimw tinen akkar ika tinen maram, pun än Kot ling a tinetiu won, o ewe Lam iei an atitin.
24Iwe, ekewe aramasen fanüfan repwe fetal lon an saram, nge ekewe kingen fanüfan repwe uwato wöür lon.
25Ekewe asamalapen ewe telinimw ra suk unusen rän me rän, nge resap kapüngüla, pun esap chüen wor pwin ikenan.
26Repwe uwalong lon ewe telinimw pisek mi aüchea me wöün ekewe mwü.
27Nge esap fokun wor och mi limengau epwe tolong lon ewe telinimw, ika eman mi föri föför mi asäw, ika eman mi chofona. Pun chokewe chök a mak iter lon än ewe Lam puken iten chon manau repwe tolong lon ewe telinimw.
