Revelation 21

1

2

3

4

5

6

7

8

9

10

11

12

13

14

15

16

17

18

19

20

21

22

¹Ma aram mu gguy reb e tharmiy nge reb e fayleng nib be’ech. Fa bin som’on e tharmiy nge bin som’on e fayleng e yan ngabang, ma ku errogon e day ni chuw.

²Mu gguy fare Binaw nib Thothup, ni aram fa bin nib be’ech e Jerusalem ni be yib u tharmiy nga but’ nike yib rok Got, nike fal’eg rogon ni bod be’ ni bpin ni nge mabgol nike yin’ e mad rok ni bfel’ ni nge yan ngar mada’gow e pumo’on rok.

³Mu gu rung’ag ba lam ni ba ga’ ni be non u tagil’ Got ni be ga’ar, “Chiney e keb i par tafen Got nga fithik’ e girdi’! Bayi par rorad, ma bay ra manged girdi’en. Mi Got e bay i par rorad, mi ir e bayi mang Got rorad.

⁴Ma bayi n’ag urngin e lu’ u owcherad. Ma aram e dab ku unim’, ma dabki i kireban’uy, ma dab ku un yor, ma dab ku un amith. Ya tin kakrom ban’en e ke chuw.”

⁵Ma fa’anem nike par nga tagil’ e ga’ar, “Chiney e nggu thiliyeg urngin ban’en nge be’ech!” Miki ga’ar ngog, “Mu yoloy e ren’ey, ya pi thin ney e ba riyul’ mrayag ni ngan pagan’uy ngay.”

⁶Me yog ni ga’ar, “Ke m’ay! I gag fare Alfa nge fare Omega, ni aram e tabolngin nge tungun. En nike yib e belel ngak e gu ra pi’ e ran ndariy puluwon ngak nge unum, ni ran ni yib ko fare alublub ni ran riy e ma pi’ e yafos.

⁷En nra gel nde pag ir ko kireb e ba’aray e n’en gu ra pi’ ngak: gu ra mang Got rok, ma gu ra fakay.

⁸Machane pi’in nra paged gag ni bochan e yad be rus, nge pi’in nda ur yul’yul’gad ngog, nge pi’in ur puwlaggad, nge pi’in nra thanged e pogofan, nge pi’in ni ur ngongliyed e ngongol ko darngal, nge pi’in ur piggad nge pi’in ni ur ted fan e liyos ma yad be meybil ngay, nge urngin e pi’in ur lifithed l’ugunrad e tagil’rad e fare lipath i nifiy ni be daramram ko sulfur, ni aram e bin l’agruw yay e yam’.”

⁹Ma bagayad fa medlip i engel ni bay fa medlip raba’ i n’em rorad nib sug ko fa medlip i gafgow ni ir e tomur e yib ngog me ga’ar, “Moy, nggu dag ngom fare pin ni nge mabgol, ni ir e ppin rok fare Fak e Saf.”

¹⁰Me ying fare Kan Nthothup ngog, me fekeg fare engel nga daken p’ebugul bburey nrib tolang. Me dag ngog yu Jerusalem, ni fare Binaw nib Thothup ni be yib u lan e tharmiy nga but’ nike yib rok Got,

¹¹ni be galgal ram’en nga ram’en Got. Re binaw nem e be galgal ram’en ni gowa malang nib tolang puluwon, ni bod ba malang ni jasper, nra yan e changar u fithik’ ni bod e krystal.

¹²Ma bay e yoror riy ni ba ga’ ma ba tolang, ni ragag nge l’agruw e garog ni bay riy, ma ragag nge l’agruw e engel ni yad be matanagiy e pi garog nem. Ma langan e pi garog nem e kan yoloy fithingan fa ragag nge l’agruw i ganong rok e girdi’ nu Israel ngay.

¹³Ma ra baraba’ ma dalip e garog ni bay riy; dalip e bay ko ba’ ni ngek, ma dalip ko ba’ ni yimuch, ma dalip ko ba’ ni lel’och, ma dalip ko ba’ ni ngal.

¹⁴Ma fare yoror ko re binaw nem e ni ubung nga daken ragag nge l’agruw i malang, ni ir e kan yoloy fithingan fa ragag nge l’agruw i apostel rok fare Fak e Saf ngay.

¹⁵Ma fare engel ni fa’ani non ngog e bay ba ley i fol ni gol u pa’ ni nge foleg fare binaw ngay, nge pi garog riy, nge yoror riy.

¹⁶Re binaw nem e ta’reb rogon n’umngin nge radan. Me foleg fare engel fare binaw ko fare ley i fol rok, ma ragag nge lal mir’ay e mayel n’umngin, ni aram n’umngin i radan nge tolngin.

¹⁷Miki foleg fare engel e yoror ko fare binaw, ma l’agruw mir’ay nge ragag nge nel’ e fit tolngin, ni bod rogon e fol ni yima fanay, ni ir e yibe maruwel ngay.

¹⁸Ma re yoror nem e ni ngongliy ko malang nib tolang puluwon ni jasper, ma re binaw nem e ni ngongliy ko gol ni yigo’o gol, nra yan e changar u fithik’ ni bod e thirek.

¹⁹Ma fapi malang ni ir gelngin e yoror ko fare binaw u but’ e kan nunuwnag nga urngin mit e malang nib tolang puluwon. Bin som’on fapi malang ni gelngin fare yoror u but’ e ni ngongliy ko jasper, ma bin migid ngay e ni ngongliy ko sapphire, ma bin dalip e ni ngongliy ko agate, ma bin aningeg e ni ngongliy ko emerald,

²⁰ma bin lal e ni ngongliy ko onyx, ma bin nel’ e ni ngongliy ko carnelian, ma bin medlip e ni ngongliy ko quartz ni maguchol, ma bin meruk e ni ngongliy ko beryl, ma bin mereb e ni ngongliy ko topaz, ma bin ragag e ni ngongliy ko kalcedony, ma bin ragag nge ta’reb e ni ngongliy ko turquoise, ma bin ragag nge l’agruw e ni ngongliy ko amethyst.

²¹Ma fa ragag nge l’agruw i garog e ragag nge l’agruw i churuwo’ nu l’ugun e yar; ra reb e pi garog nem ma ni ngongliy u ta’reb e churuwo’ nu lan l’ugun e yar. Ma kanawo’ ko fare binaw e yigo’o gol, ni ra yan e changar u fithik’ ni bod e thirek.

²²Ma da gguy ba Tempel u lan e re binaw nem, ya Tempel riy e aram Somol ni Got, ni Gubin ma Rayag Rok, nge fare Fak e Saf.

²³Ma re binaw nem e dariyfan e yal’ ara pul ni nge gal’ daken, ya ram’en Got e be gal’ daken, ma fare Fak e Saf e ir e magal riy.

²⁴Ma girdi’ ko pi nam nu fayleng e bay uranod u tarama’en, ma pi pilung nu fayleng e bay ra feked e fel’ rogon rorad i yib ngalan.

²⁵Ma fapi garog ko fare binaw e bay i par nib mab ni polo’ e rran; ndab kun ning bi’id, ya gathi bay ki neap’ u rom.

²⁶Ma gilbuguwan nge fel’ rogon rok urngin e pi nam e bay ni fek i yib ngalan e re binaw nem.

²⁷Machane dariy ban’en nib kireb nra yan ngalan e re binaw nem, ara be’ nma ngongliy e tin yira tamra’ ngay ban’en ara ma lifith l’ugun. Ya kemus ni pi’in kan yoloy fithingrad ngalan e babyor rok fare Fak e Saf, ni babyoren e pi’in kar fosgad e yad ra yan ngalan e re binaw nem.