Jahunec Je Camasac Muden 21

1

2

3

4

5

6

7

8

9

10

11

12

13

14

15

16

17

18

19

20

21

22

¹Odocob ija sao haun maha haunca fem. Ge, sao weledec maha weledecca qee mi hedosin. Macas ha qee mi hedon.

²Odocob ija taun gun ben fem, eu Jerusalem haun, eu Anut odocob sao jobonnadec toni nen. Eu saciadu hedoc bilia, caja uqa dana ocnu bala falimei gemug sumudinawe.

³Odocob ija king bilec cabalnadec jejeg ben oso mamaden dah mem, “Qila Anutna jobon eu dana gemo bilia! Uqa ageca biluqagan. Odocob age uqana dana cajaca biluqagan. Anut uqadodoc age gami biluqagan. Uqa agena Anut biligian.

⁴Uqa amaganadec amulunuga cunugca cacuadigian. Ceteh weledec eu cunug qee mi hedon. Eunu ono dana haun qee cal mowain, age walocca haun qee biluwain, age haun qee qajowain, age haun dain adecnu qee owain,” en.

⁵Odocob oso uqa king bilec cabalna bilina eu maden, “Qila ija ceteh cunug haun ifaniga!” en. Uqa ijaha haun odi maten, “Je i mele bahic, odocob dana cunug age je inu wawaga meleigiannu ihoc. Eunu je i jaqaga,” ten.

⁶Odocob uqa maden, “Ceteh cunug eu wele hedoia! Ija aqunec, ija cit qoc. Ija sanan mec, ija hedoc. Dana oso wa gab cagudocob eu ija uqa wa cebac fifiji benanadec wa fajecca qee jecnu cois docomin jigian.

⁷Oso uqa gagadic mimi han wooldona eu ceteteh cunug eu ijanadec muguh ugian. Ija uqana Anut biligen, uqa ija melami biligian,” en.

⁸“Euqa dana cucuiimeig bicbic beleginaca, dana wawaga qee meleena euca, dana kobol gegehinca odoginaca, dana age dana aqeginaca, dana wal cajaca nijeginaca, dana ceeh jeladeginaca, dana kadan tibudnu cuha feginaca, dana cunug uhulec je madeginaca eundec agena cudun eu wa gudoc benwe eu jaca ja meen jan dainca cijina agena. Cudun eu cal mec lecisdoc,” en.

⁹Odocob ensel 7-pela age boh 7-pela eu dana cajaca me qee madecnu ceteh 7-pela am ben eu hewein eundec oso humei maten, “Hoga. Ija caja dana oc ihachigen, eu Sipsip Nag aideg,” ten.

¹⁰Odocob Kisca ija hewiti ibulteceb ensel eu gahiti aluh ben oso ohis bahic igocna ehi ti miten. Uqa Jerusalem ihacten. Eu taun gun, Anut odocob sao jobonnadec toni nenen fem.

¹¹Eu Anutna kobolkobolca waleli nen. Taun ben eu meen uqana qaig ohisca jaspa cinigwe walelen. Eu camasac bahic, eu glas cinigwe.

¹²Taun ben eu gel cecelac ohisca. Gel eu jic cebec 12-pela tawen. Ensel 12-pela age jic cebec eu cofdudu tawegina. Jic cebec filfilna eu Isrel dana cajaca agena sihul 12-pela eu age ijanaga jaqijaqi qelein.

¹³Jic cebec cijed eu gel qeih 4-pela cunugna tawein. Cijed eu cam tobi benana isec tawein, cijed eu notna isec tawein, cijed eu sautna isec tawein, cijed eu cam toni nonana isec tawein.

¹⁴Taun ben eu uqana gel eu meen big gug 12-pelana cehein. Meen big gug euna Sipsip Nagna aposel 12-pela eu age ijanaga jaqein.

¹⁵Ensel uqa ija maten eu ihoc mecnu na tutuc goldna mudec hewen. Uqa ihoc mec na euna taun ben eu bagalan ganicca, cecelac ganicca, ohis ganicca ihoc mi figiannu. Uqa taun benna cebecca, gelca ihoc mi figiannu.

¹⁶Taun ben eu tutuc bahic tawen. Uqana cecelac uqana bagalanca eu ihocihoc. Ensel taun ben eu ganic docnu ihoc men. Uqana cecelac eu 2,200 kilomita. Uqana bagalan eu uqana cecelac ihocihoc. Uqana ohis eu uqana cecelac ihocihoc.

¹⁷Ensel uqaha gel uqana teehug eu ganic docnu ihoc men. Uqana teehug eu 144 mita. Sanijec mita i ensel uqa ihoc men eu dana cunug mita eu odi ihoc megina.

¹⁸Gel eu meen jaspana mudein. Taun ben uqadodoc eu gold soidoc bahic euna mudein, eu camasac bahic eu glas cinigwe.

¹⁹Taun ben uqana gel uqana meen big gug eu meen qaig ohisna fajecnu filfil euna bala faldoin. Meen big gug osahicdoc eu meen jaspa, meen big gug lecisdoc eu meen sapaia, eu meen gaga cadibca, meen big gug cijeddoc eu meen aget, meen big gug 4-peladoc eu meen emeral, eu meen gaga na bagacca,

²⁰meen big gug 5-peladoc eu sadonikis, eu meen gaga gol jedocca, meen big gug 6-peladoc eu meen konilian, eu meen gaga golca, meen big gug 7-peladoc eu meen krisolait, eu meen gaga janca, meen big gug 8-peladoc eu meen beril, eu meen gaga na bagacca, meen big gug 9-peladoc eu meen topas, eu meen gaga janca, meen big gug 10-peladoc eu meen krispres, meen big gug 11-peladoc eu meen haiasin, meen big gug 12-peladoc eu meen ametis, eu meen gaga golca.

²¹Jic cebec 12-pela eu gilolo senenec 12-pela, eu fajecnu qaig eu ohis. Jic cebec abesabes eu gilolo osolna mudein. Taun benna jic cunug eu gold soidoc bahicna mudein, eu camasac bahic glas cinigwe.

²²Ija tempel oso taun ben dunuh qee felem. Ge, uqana tempel eu Anut Tibud gagadic odocca Sipsip Nagca.

²³Taun ben eu camfo, jagelfo fulacdocnu qee nijel. Ge, Anutna kobolkobol eu uqana fulacdona. Sipsip Nag eu uqana gowoc.

²⁴Dana cajaca hatu filfilnadec age fulacdoc euna coboqagan. Odocob mahanadec king age agena cehewanaga cedi ahu dunuh loqagan.

²⁵Deel cunug taun benna jic cebec eu age hudi qelec tawigian. Age qee menecebil taweiaun. Odocob ono witic qee nijiaun.

²⁶Hatuhatu filfil age agena ceteteh me bahicca cehewanagaca taun ben dunuh cedi loqagan.

²⁷Euqa ceteh gegehinca oso taun ben dunuh qee leiaun. Dana oso majagca odonaca, uqa uhulec je madenaca taun ben dunuh qee leiaun. Dana age ijanaga Sipsip Nagna cebac bilec bukna jaqein eu age dih taun ben eu dunuh loqagan.