1Maa-nauraa maqáfa faqa innaarúna faqa ooruku námmari faqa dóo taikánau. Taikáfufanoo fúka innaaruna faqa maqá faqa óoqeenáana ámaaqa maqasoofaqa qáfaqiafana.
2Qinée qáfaafananoo Ánutufa qufanoo fúka náaquqara máqusa fúka Yeerusaree innaarúnaindari qumuréenoo óoqeenáa Yeerusaree ámaaqa maqafufaqa qáfaqiafana. Fúka anaasee amundáranara foora afaaqa áuqirafa fúka maqasaa qúminau.
3Qumuroofanoo ufa moó fannoo Ánutuna innaarúna qaarísaaqari maaqí qímasee firaa kari qinau. Dóo maqee Ánutuna maqúsa faiqíki qumu máridanoo. Mifá misá faqa márinaqa misá miná faiqí ánaasee márifaranoo. Ánutufa narí uqanna misá faqa márinoo misá Ánutufa máriannoo.
4Mifá aiqámausa naukunu rukáannoo. Sía kafáa kúqirafa faqa ikífaafau qírafa faqa ikíráqarafa faqa nídafirafa faqa sía kafáa mifáuqa máriannoo. Mi-ooqeenaa ainaináfa dóo taikáfinoo.
5Mi-ufáfa taikóofanoo qaarísaa márufa qiní qímaqiminoo qinau. Dóo qinée maqee aiqáma ainaina fúka kai áuqu quqáanaura. Maa-ufáusa ákara rúa, kúqaa ánoona ufa máridanoo minásaa mundímaria úfafa máridanoo.
6Kafáa qímaqiminoo qinau. Dóo aiqáma ainaina taikéenoo. Qinée óosana áraafanausa máridaqa taikáaninna áukuana faqaasa máridaqa. Nammáriara nídimarisa fúka maqákiqari ururée mari nammarina, káqi márira nammari asooárafa sía feefaurírafa káqi nímianauranoo.
7Mandáinaina rafáaqafusee úriaaqararausa qinée maa-ainainná nímianaura. Qinée misá Ánutusa márianaura misá qiní qímaakumara márifaranoo.
8Maparaa ímariasa faqa ueeqée maríasa faqa káaqa ufa rukíee maríasa faqa faiqí ánaasee kuqá nárímariasa faqa káaqa faiqí ánaaseera rímariasa faqa áukainaina máraqa nuasa faqa túmunnai faiqí nimana áuqusaida minára rufíasaida innaaru qímariasa faqa aiqáma óosana óosana únna ufa qímariasa faqa mi-mandoosanná máraqa nuasa misá maqúsai idá fárumaki márifaranoo. Miqóo idá firaafá fasafasaínoo mandúndi marífa máriannoo. Mi-idána áuqu ínaaqiannaa kúqirafa máridanoo.
9Miqí qímasee qímaqimisoofanoo qangiroo moó fannoo qísauku dínni taikásee dínni ani qaara marasée márusakiqari aupúrarana maqásaa téeqimaríasakiqari moó fannoo anirée qímaqiminoo qinau. Yoohanee anée maí aniráinaqa auníriranasaa kúqu sipsipa anaaqína miná ánaaqa amundárana aní uqafíqaanana qáfa.
10Miqí qímasoofanoo Ánutuna maraquna fannoo qiní dáakufufanoo qangiroo fannoo rafúsueeqeenoo kísaaqa aaqanasaa quqáqisánau. Miqóoqari náaquqara maqusa fúka Yeerusaree máqusa innaarúnaindari Ánutufinnaindari qúmuna uqaqífiqanau.
11Qúmimarufanoo faqa qumu márinanoo faqa minakíqari Ánutuna káaqa aréenarafa minakíqari tákunasoosa ímarinau. Mi-fuka maqusáfa pupú óoni tánukaidara foorá qéemarinau.
12Mi-fuka maqusána faandaamurafa óoninnai áuquqoofa márinau kísaaqa ámatooki kámminoo márinau minakí qísaukuqara taikásee qíku óoqu qaaraqánda marasée kooqí márinau, aiqáma kooqisaa qangiroo moó fannoo rakísimarinau. Mi-kooqísasaa Isaraeena áiku ásauku márusa qísaukuqara taikásee qíkunni óoqu qaara marasée núqu mi-kooqísasaa ákara rinoo márinau.
13Súani óosana ururée maruqaannai faandaamurasáa qaaramoó kóoqi mi-qaannái márinau. Súani kéeqee marú qaannai qaaramoó kóoqi márinau. Súani dínni ataaqee qaannai qaaramoó kóoqi márinau. Súani dínni ataaqee qaannai qaaramoó kóoqi faandaamurasáa márinau.
14Mi-ooni faandaamurána óosanaki qísauku qara taikásee qíkunni óoqu qaara marasée firaa ooniuqa márinau. Mi-oonísasaa sipsípa ánaaqi Yísuna áiku ásauku qísaukuqara taikásee qíkunni óoqu qaara marasée marúsa núqu mi-oonísasaa ákara rínoo márinau.
15Mi-qangiroofá qiní qímaqimímaruna ásaukuki ruráa kóora áuqimaruna uqusée máriunannai mi-fuka maqusána faqa faandaamura faqa kooqíuqa faqa amanamásee qáfanau.
16Mi-fuka maqusána ataaqéenni faqa miná sandáaqai faqa amana amana kái márinau. Aiqáma tu tauséenna faqa foo handaréeta faqa (2,400 kilometer) miná kísaaqa miqímaseenoo kísaaqa uqanna mi-maqusána áti faqa márinau.
17Mi-fuka maqusa faandaamuráfa fáina máqa qufisara foora áuqirafa márinau. Mi-qangiroofá faandaamura máqasaaqari ámmuqunni amanamásee qáfamaseenoo sikisti metera amana máridanoo feé qinau. Kísaaqa uqanna márinau.
18Mi-faandaamuráfa pupú óoninnai áuqirafa márinau, mi-maqusánaki máaqauqa kóorannai karásakiara foora ruqíaki qáfee marufa idaaqírafa uqanna márinau.
19Faandaamura óosanasaa firaa ooniuqa márufa firaa feefauru áqusaida máree maría óoniuqa mi-firaa oonísasaa afaaqa áuqiiqee maríqau. Faandaamura firaa ooniuqa qísaukuqara taikásee qíkunni óoqu qaaraqánda márara óoni mapukíra óoni nifaaqa áuqira óoniuqa máridaqa, núqu faqaa óoniuqa máriqau. Moo óoni afaaqa moo áuqirafa miná áuqu yasapeera márinau. Mifá saqári ámanee árirafa amanandá tánukaida qéemarufa márinau. Moo óoni afaaqa áuqirafa miná áuqu akafata márinau. Mifá dirindáasi áriranasaa indiri óoni árirafa márinau. Moo óoni áuqu eemararada márinau. Mifá pupú óoni moó saqári ámanee árirafa márinau.
20Moo óoni áuqu saradoonikisa márinau. Mifá pupú óoni moó éekara faqa saapáani óoniara foora írafa faqa márinau. Moo óoni áuqu kananeeriana márinau. Mifá taatuqée saapáani márinau. Moo óoni áuqu koosa márinau. Mifá pupú óoni moó tumána árirafa márinau. Moo óoni áuqu beerira márinau. Mifá arooqá óoni fooqáafa saqári amanee árirafa márinau. Moo óoni áuqu toopasa márinau. Mifá pupú óoni miqírafa tumána árirafa márinau. Moo óoni áuqu karaseedooni moo óoni márinau. Mifá pupú óoni miqírafa saqári ámanee árirafa márinau. Moo óoni áuqu tookueesa márinau. Mifá óoni moó saqári ámanee árirafa márinau. Moo óoni áuqu ameetisa márinau. Mifá arooqá óoni miqírafa pánnoona árirafa amanandá qáfee marúfa márinau. Faandaamura firaa ooniuqara mapukíra óoni fée qiqau misá núqu miqíminoo máridanoo. Qísaukuqara taikásee qíkunni óoqu qaaraqánda marasée márinau.
21Fúka Yeerusaree máqusa qíkunni óoqu qaara marasée kooqí márinau. Aiqáma kooqi faandaamurasáa máaqa kooqíara foora áuqinoo márinau. Óoni firaaná qumáree minakí ititée marú óonisa feefaurú áqimarí óonisa firaa ooniuqa óonda̱ firaaná fooqáafa márufaqa qáfaqiafana. Maqúsa qámbaana faqa naambeéqai faqa aiqáma ámiqira kóorannai áuqirafa amanandá qáfee marúfa márinau.
22Qinée Yoohaneesa fúka maqusa Yeerusaree qáfamaseeqa náaquqara amaana máqara randéeqa sía márifaqa qáfeeqa. Amaana máqa márinoofau fífau máriqini. Karaambáiqa Ánutufa úriqararafa sipsípa ánaaqi Yísufa faqa miqóo akooqóo márunara amaana máqa sía márinau.
23Súani faqa quqoona faqa márinaqau qáfani. Sía mári qáfeeqa. Máridanoofau fífau máriqini Ánutuna narí firaa areenarafa firaaqóo káaqa qámaqinoo máridanoo, sipsípa ánaaqi mi-maqusána qóomara foora máridanoo.
24Aiqáma maa-maqa maaqánasaaqaraasa mi-maqusána káaqa qáranasaa nifáranoo. Misá karaambáiqauqa nári ámiqira ainainauqa mi-maqusánaki múnu quqéefaranoo.
25Mi-maqusa kooqísa aiqáma faasaana atúanoo kai máriannoo eendáki faqa sía ititéefaranoo, sía eendá máriannoo káaqa qárafa kai máriannoo, minára kooqí sía ititáidaqa.
26Aiqáma maqa maaqásaa máriasa misá ámiqira ainaina faqa misá úriqarara áinaina faqa máree anirée mi-maqusánaki fúka Yeerusaree máqusaki kai quqéefaranoo.
27Sía moo mánda ainaina fannoo mi-maqusánaki kéeqaannoo. Sía moo ásaurira ainaina áuqee marí fee únna ufa qímari fee sía mi-maqusánaki kéeqeefaranoo. Sipsípa ánaaqi fannoo maqásaaqaraasa narí papiqakí núqu ákara rúmaqaisa misá kai mi-maqusánaki kéeqeefaranoo.
