APOKALUPO 21

1

2

3

4

5

6

7

8

9

10

11

12

13

14

15

16

17

18

19

20

21

22

¹Bena guba matamatana bona tanobada matamatana na ita; badina be guba gunana bona tanobada gunana vada e puki, davara danu lasihia.

²Bona hanua helaḡana, Ierusalem matamatana, na itaia, guba amo e diho, Dirava ena amo, be headavamu ulatona na heto, e haheraia adavana ena.

³Bena ere ta na kamonai, terono amo ema, e hereva badabada, eto, Dirava ena noho gabuna na taunimanima dekedekediai; ia na bogaragidiai baine noho. Idia na iena bese ai baela; ia ese baine hamodia, edia Dirava.

⁴Ia ese iruru-matadia iboudiai matadia amo baine dahu oho. Mase bona dara-doko bona taitai bona hisihisi bae ore; badina be ḡau gunadia vada e puki.

⁵Bena terono ai e helaimu Diravana eto, A itaia, lau na ḡau iboudiai na hamatamatamu. Ma eto, A torea; badina be ini hereva na mamaoro-mamaoro bona momomo-kakani.

⁶Ma e hamaorogu, eto, Vadaeni; lau na gini-gunana bona gini-gabena, matamana bona dokona. Ranu mase tauna na e lohilohi daemu mauri-ranuna baine henia, asi davana.

⁷Kwalimu tauna ahuna binai: lau na ena Dirava ai bainala, ia na natugu ai bainela.

⁸A gari taudia, asie kamonai taudia, kara bodaḡa taudia, ala-ala taudia, babalau taudia, kaivakuku e toma henidia diho taudia, koikoi taudia, iboudiai ahudia na lahi bona teio gohuna: mase iharuana bunai.

⁹Bena aneru hituosi, hari kibo hituosi lalodiai hahehisi gabedia hituosi e abi anerudia, ta ema, e hereva henigu, eto, Aoma, headava matamata hahinena, Mamoe Natuna adavana, baina haheitalaimu.

¹⁰Bena lauma ai e laohaigu, ororo badana ta dorina ai. Bena hanua helaḡana, Ierusalem, haheitalaigu, guba amo e diho, Dirava ena amo.

¹¹Ia hairaina na Dirava hairaina; bona diarina na nadi hururu-hururuna, davana bada ḡauna, na heto, iaspi nadina na heto, e negari-negari.

¹²Ia na mai maḡuna: maḡuna danu lababana na bada bona harana na lata. Ikoukouna na gwauta-rua. Ikoukou badidiai na aneru gwauta-rarua, bona ikoukou daediai Israel iduhudia gwauta-ruaosi ladadia e tore.

¹³Laurabada kahana ai ikoukou toi, mirigini kahana ai toi, diho kahana ai toi, bona lahara kahana ai danu toi.

¹⁴Bona maḡu badina nadidia na gwauta-rua, ohedia ai Mamoe Natuna ena aposetolo taudia gwauta-raruosi ladadia e tore.

¹⁵Bena hari e hereva henigu aneruna imana ai na hahetoho ḡauna ta, gold amo e karaiaa ḡauna, hanua bonaa ikoukou bona maaḡu ihahetohodia.

¹⁶Hanua na e hadaia kaha haniosi heḡereḡere; roha-maorona bona lababana vada heḡereḡere. Bena ena hahetoho ḡauna amo hanua e hahetohoa, maila daha-ta sinahu-ima roha-maorona bona lababana bona harana-latana vada heḡereḡere.

¹⁷Maḡuna danu e hahetohoa, roha hari-ahui taurahani, taunimanima bona aneru edia hahetoho amo.

¹⁸Maḡu be iaspi nadina amo e larebaia, a hanua na gold herea-daena, to e negari-negari.

¹⁹Hanua maḡuna badina nadidia na nadi hururu-hururudia e haheralaidia. Gini-gunana na iaspi nadina, iharuana na sapairo, ihatoina na kalakedo, ihahanina na samarago,

²⁰ihaimana na sadonu, ihatauratoina na sadio, ihahituna na krusolito, ihataurahanina na berulio, ihataaurahani-tana na topasio, ihagwaautana na krusoiparaso, ihagwaautatana na huakinto, ihagwauta-ruana na ametuso.

²¹Ikoukou gwauta-ruaosi na ageva mai hairaidia gwauta-rua; ikoukou ta aḡeva mai hairaina ta. A hanua ariarana na gold, to e negari-negari.

²²Hanua lalonai dubu ta asina itaia, badina be Lohiabada, siahu idoinai Diravana, bona Mamoe Natuna, na una hanua dubuna.

²³Dina bona hua danu na lasi, una hanua asie raraia; badina be Dirava hairaina ese e hadiaria, bona ena lamepa na Mamoe Natuna.

²⁴Bese idau-idau ese ena diari ai bae raka, bona hanua pavapavadia ese hairaidia bae rakalai vareai.

²⁵Dina ai hanua ikoukouna basie kou; bona hanuaboi na lasi unuseni ai.

²⁶Bese idau-idau ese hairaidia bona hematauraidia bae rakalai vareai.

²⁷Hahedika ḡauna ta eiava lebulebu tauna eiava koikoi tauna unuseni ai basine raka vareai, a Mamoe Natuna ena mauri bukana ai ladadia e tore taudia mo.