1Mina usi oma ma kono ruaka veyaka, adina ouresi oma ma kono roro niyadi ma davara ka koina niyo.
2Ma taoni kikifa, Jerusalem ruaka Sei rofu oma gutuna deyo ma veyaka. Bi mego rema ini maruka rofu dogo resi moi matuka reyo kana.
3Kamini ourefeidena amena fata gutuna goroka tora niyo ma neideyaka. Niyo: “Aiyo, Sei di amena sana bi amiyesa. Ina venesa amebigo ma ina bi ini vene. Sei iniye bi ina venesa ini Sei kana amebigo.
4Resi ini nemoko di ne koru tau gade moi ugago ma muyena bi koina nigo. Guruo rena, isaka nina ma esika moina ka bi koina nigedi, adina sena di beika baika bi koina niyadi mini.”
5Ye Ourefeidena amena fata amedo amiye yaku niyo, “Na yaku beika baika tau gade moi ruaka rida!” Ka niyo, “Mina bura re, adina mina ago bi mokena vari gira aegi rofu ma rama.”
6Resi ka na niyo, “Koina niyo mini! Na bi ouresi ma gabi, kora rena ma metona. Koru vaido amiye rofu davana yokoi de nufa, vegu amena di buruka koru magida.
7Ebu redo amiye yaku mina moigo ma ini Sei nigida ma nai mida nigo.
8Idu, mokei itu rededi vene, mokena vari gira de aededi vene, mokena no iniye nufa vene, amiye emuyededi vene, koa rededi vene, ore rededi vene, ofa sei nivakededi vene ma ofa ofa nidedi vene tau—bi fore roka sulphur dudu ita moka tora vaido sanari rau regedi. Mina bi muyena remanu ere mini.”
9Kamini Sei di naivo naivo vima 7 ri, yokoi kaere bi mina metona beika no iniye 7 di dodoku 7 vata baeyadi nufa, na rofu baesi niyo, “Bae kumo na yaku mego rema ya oteimagida, kaere bi Mamoe mida di rema.”
10Ye Vima dudu ika tora doba odoro na afei baesi Jerusalem taoni kikifa Sei omari gutuna baena mina na oteimaro.
11Ina bi Sei di vabara dudu kama redo; fore buni vayavaya kana, fore roka jasper kana, neva dabu dabu ma garasi rama guta kana.
12Bi kota doba tora nufa; ini ida vena di biri bi 12 ma mina ida vena di biriri bi Sei di naivo naivo vima 12 are reyadi. Mina ida venari bi Israel di mida mida di rubu 12 di roka bura reyadi.
13Meda dadido eta rofu bi ida vena di biri regodenu, meda baedo enana eta rofu bi ida vena di biri regodenu, meda baedo rama eta rofu bi ida vena di biri regodenu, ma meda nedo eta rofu bi ida vena di biri regodenu.
14Mina taoni di kota bi fore 12 fafau akuyadi; ina fafau bi Mamoe mida di nifeidena amiye 12 di roka neinei.
15Na rofu ago niyo Sei di naivo vima bi taoni, ini ida vena ma ini kota di doba gokaisanu baku regika goro dudu riyadi kodu nufa.
16Taoni di eta 4 bi yokoi maka; ini doba ma ini rafo bi yokoi maka. Ini kodu dudu taoni di doba bi gokaisanu baku reyo: bi 2,400 kilometre. Ini doba, rafo ma odoro bi yokoi maka.
17Ina ka ini kota duaiya reyo: bi amiye di duaiya rena kana ini odoro bi 60 metre; mina bi Sei di naivo naivo vima di duaiya reyo kana.
18Mina kota bi fore roka jasper dudu riyo, ma taoni ideri bi goro kino yokoi de nufa riyo, garasi kamanika kana.
19Taoni di kota fore bi fore buni vayavaya bouna bouna tau gade dudu moi matuka reyadi. Ouresi bi jasper, remanu ere bi sapphire, regode ere bi agate, 4 ere bi emerald,
20ma 5 bi onyx, 6 bi carnelian, 7 bi quartz bora, 8 bi beryl, 9 bi topaz, 10 bi chalcedony, 11 bi turquoise ma 12 bi amethyst.
21Ma ida vena di biri 12 bi fore roka pearl; mina ida vena yokoi yokoi bi pearl yokoi maka dudu riyo, ma taoni di ida bi goro kino yokoi de nufa neva dabu dabu garasi rama guta kana.
22Ye taoniri bi nivakena yava yokoi de veyaka, adina Varika amiye Sei yeiva iniye ma Mamoe mida bi ini nivakena yava mini.
23Taoni bi meda ma eyo rofu de damani reyo, adina Sei di vabara yaku kama reyo ma Mamoe mida bi ini ramefa mini.
24Gagani gagani vene yaku ini vabara dudu nana regedi ma kono di kini yaku ini ideri ini gugura tau vabara moi baegedi.
25Ma ini ida vena bi medari toga biri de rigedi, ye mironari bi urusa koina.
26Gagani gagani vene yaku gugura buni buni ma kikifa ini ideri moi baegedi.
27Idu beika yokoi kino toga dui de rego ma kaere beika bi no iniye o ofa dudu mina redo bi dui de rego, idu kaere ini roka bi Mamoe mida di vegu amena di bukari bura reyo, ina maka dui regedi.
