Psalms 40:2-17

²Ani mutim lom gege karogo iwita ningi bagerem se nu aninga patawuram se bausem se sor garagarayam aora mu te aga beteram se sanamerem.

³Ale amilmil aisam se noko nup te patawura ko wur bo iru ilusam; suen biya munan imi arigimon ale ko sinar amon, ale Yawe te la ira sanami se lagamonko.

⁴Awiriya Yawe te la ira sanami lagoso mu amilmilarukko; nu nunumi patawura alo se kaem kawel alo nogowom karo ko kariimet mu me karo nungarso.

⁵O Yawe, aninga Kaem, ni kilek bibiya sokel ago suen biya beterem; ni ana nago ko ikia ningo ningo nunguru awurem. Kari bo ta nika tuar mena; ani betela nika munan suen biya umu balu saparikko me terong tala, mu awuk, mu suen biya nunguningkiri.

⁶Ni aninga tama bita kisa ko munan mu te me loaga lagasam, bare ni aninga adogowa galuwurem se te kiring iki karo tuekko. Mel altar te kai sapasan mu se, memek te siwu nangaruko tama bita kisa mu ni me te gemang tawun biya aniso.

⁷Se ani balem, “Ani ni kiring karo tuekko tairem iweya, nika batoga te ani ago ko iwitata balem se aniso.

⁸O aninga Kaem, ani nika gemang karo tuekko ninguru kuesam; nika den mu aninga angamang motam ningi aniso.”

⁹O Yawe, ni ikisam, ani biguwura biya ningi agiring me kalosam, nika saonga te nanga sangaru taem mu ko nunga manaru lagasam.

¹⁰Ani nika diram la karo tuata ko munan mu se, ka kiwem ana me nanga bita ariga, nangarak la baga se nanga sangaru tata ko munan mu ko agiring me kalosam. Ani nika kariimet biguwura ningi, nika gemang lila se ka munan nunguning mu ko nunga manaru sapasam.

¹¹O Yawe, nika gemang lila ani ago ko mu me to ilupko; nika kua aisa ale ka bitua yawara mu pempem la aninga iramurokko!

¹²Mu awuk, ani ikup memek suen biya aga lautam; se aga memek bita lagerem mu aga iramuram se kulupik bo te aratikko mena. Aga memek mu suen biya nunguningkiri, se kaura moke mena; se angamang motam sokel mena saparam.

¹³O Yawe, gemang aisu ale aga sangaruko; pasak ala tair ale aga sangaruko.

¹⁴Se kariimet aninga momonko negawasan mu dolomon ale parasa namamonko; ale nuna ani memek te namarikko nongomang aniso mu, pelemon ale magi magi namamonko.

¹⁵Ale awiriya aninga gusirsan mu nunga dolara nunga iramurokko.

¹⁶Bare kariimet nika kua lagasan mu nonoman nungeruk se ni ko ko amilmilamonko; kariimet ni nunga sangaruko nomotam bita lagasan mu pempem balmon, “Yawe mu ningo!” ma balmonko.

¹⁷Bare ani kituwura, asokel mena; buta se O Biya, ni ani ago ko kamili me saparukko; O aga Kaem, ni aninga saonga se aga bataguru ta ko kari; ni pasak ala tair ale aga sangaruko.