SAM 40:2-17

²Na unzing aminu tapatu gapma mamaya siknga dakaatang pukuke akumnanga yuak binga yukum. Siwan ngana Buyambam tapata kaiwan akopbum. Na ngwayuk kanzang gwekatang asiknga tanggaganuwan yukum. Siwan ngana ita kaiwan akopa keu supna kaya komune napmamban kekeknga gatu kukum.

³Siwan gatu ita kau kayuu takngatu taiwitde nanikut. Kau waaknga Anutu ninda banip sikamang kapae umana yatangenatnanga. Siwan nata kau waaknga taiwa aminbamda na nanduke akgwauke Anutue banip sining.

⁴Aminu Anutue banip singgak kapa apbakngayok. Aminu unzing kapa yamandet aminkat dua gatake sukukaing. Siwan ita Buyambamtapa dua teke anutu pupukngae munu dua pukgak. Wena siknga.

⁵Anutu, Buyambam tapana, gata puya nomanu kwaapzang nin gatanimunangge tasikuyak. Aminu ga binga tapatu wena. Gata asiknga yapbikuyak. Sike nata gae wamu amin yanike puya gata tasinggayakge gatu natdetdet takngakaatde yaniwiu mateknga dua. Mate! Sanga wa kwaapzang siknga. Gata sangabamu nin gatanimunangge pekuyau kendetnanga dua.

⁶Siwan gata kaau kuupbam atzipmake katap sawa yasisopuwa waiaknganin sandewiyakge tasikaking kakngae ga apbitakuyak. Siwan ngana gata nae banip tangenawi maak gwaknga kwapan gae wam tawake tasinggat.

⁷Tasike anzing yakum, “Ayok. Anutu, na gae gwa aput.” Dasingge, tupa nata apitde wamu buk gomune matakut takngae natake yakum.

⁸Anutuna, na gatane mama wamba banipmaatang natapa kekekawan gae banip tawanangge take siknga nataat.

⁹Buyambam tapa, nata gatane wamu takeaknga aminbamde ayanikapmanggat. Yanikapmake, Buyambam tapata ninu gatuna apanggak ngang yaninggat. Sike Buyambam tapana, gata wamu wa yanikapmanggatde atnataayak. Nata wamu waaknga asinggan yakapitde nata gena dua umuke yuwit.

¹⁰Nata sanga gata noman nomana tasinggayak kaknga musipmaatangu dua takusopunggat. Aho. Gata wamu yawi kekekakut saak tawake na gatu takuyakge ayanikapmanggat. Siwan gata aminbamde musip gwaang natake gata kepi noman taknga siknga tawake tawanggayakge nata wamu waaknga aminu mitie unekan yuaingune dua takusopunggat. Wena. Nata ayaninggat.

¹¹Buyambam tapa, na atnataat. Musip kwikwiu gatane aknga nae natangamunangge ma kotnawim. Wena! Gata nae butaya asinggan nataayak. Gata nae take natangamuke gata wam noman takngaka tawanggayak. Waaknga tawake gata na kakuya asinggan tasinggayak.

¹²Meya kwaapzang siknga nae apan nata natdetnanga dua singgak. Gutonga aknga nata tasinggat takngata na atnutapan pimake kawa sananga dua singgak. Gutonga aknga kwaapzang sikngata natane gwapak danggama ayapbikgak. Siwan natane musipma tuyuknga siwan na kekekananga dua singgak.

¹³Buyambam tapa, gata na gatuka tapso. Gata zet apu gatangamuyo.

¹⁴Aminu kunduta na nuwan kupitde tasikaing. Ge gata aminu wa na nutnangge tasikaingu yaipapaakusike pasiwi datdaptake asiknga maakaning. Siwan waaminu na tasiwa maiwitde apbakngakaingu yanikwasiwi kuwa umana kopsa yuaingu gata asandepakepso.

¹⁵Sandepakepuke waaminu masa wamu nae yakaingu gata pasiwi kepi gutonga tasikaingge apmaakake asiknga satnanong.

¹⁶Siwan aminu gae apukaingga musip gwaang natake gae apbakngake yutnong. Sike aminbamu gata pakuyakge asiknga bakngake yutnong. Bakngake yuke waaminda anzing yaning, “Buyambamtapa tupan sikngaapa,” ngang yaning.

¹⁷Siwan ngana na kekekngana wena. Ge nata nina gatangamunanga dua. Siwan ngana ga Buyambam tapa, gata nae atnatapso. Anutuna, gika siknga gatangamuke tanawawi yuwit. Yuwawa na zet gatangamuke mooka ma nandutewim.