Samu 40:2-17

²Yuwale koo andake ipwanju singi mendena paleyonopa baame kyawa lete nyepala kana dokona pisiya.

³Baame namba namwana Anatu lakandenge kenane enenge mende pyao mana langiya. Wambu malu dupwame dake kando pako karo repe repe laramo doko soo Kamongo baa kapa pira lao suu pyarami.

⁴Wambu isa kanape anatu lao kingi lenge dupwape anatu kyambo lenge dupwape angi lao suu pyao kara napala Kamongo doko kapa ingingi lao suu pyao karaminyi dupwa rae maiyuo kararami.

⁵Kamongo Anatu embame namwana renge malu pyakao karenge. Emba yale mende kara nalyamo. Embame rengya keyange nyera dupwa peparae rapa rapa pyakalene. Namba embena yulu peparaena lao lapuli doko yulu malu mee sipyamosa saka naro ingilyamo.

⁶Emba menana rendamu nyelana rae mai napala namba yanenge wai pyapala kumuo jelase lao rapa rapa pyaane leya. Nakamana koo dupwa kame sakalase lao mena pyao kiso jilyaminyi doko rae maiyuo nyii nalene kandelyo.

⁷Kandapala nambame buku kao pele pele lasi dokona leyamuli pyuo dae karo.

⁸Emba suu pyarenyili pyuo piri. Embena mawa pii doko nambana monarena manjo karenge, leya.

⁹Embena wambu dupwa wato leyami dokona nambame waili pii embame nyisiinyi doko polo lamaiyu. Nambame wambu dupwa kaeya nao lamaiyuoko kararo doko emba silini.

¹⁰Lete wai pyao nyiyamo doko namba yeelyo iki sepala kaeya napu. Nambame yuu peparae embena yulu keyange pyuo nyisilini dupwa lamaiyuoko karenge. Embena wambu dupwa wato letaminyi yaka lao namba roma napyuo pisa nange. Emba alowa pii nao mona reto puu pelene dokona lao lamaiyuoko karenge.

¹¹Kamongo, embame namba yuu peparae sakame kumuo karalu karare doko namba silyu. Embena alowa pii nao mona reto karalu karenge suu pingi dokome namba yuu peparae kyawa minyuo reto karara.

¹²Randa malu mee namba keta soo kako pipyasa kapa pyuo yaka lalana saka nalyo. Nambana koo dupwame namba kalya nasi minyapyasa kapa kandaro ingya nalyamo. Nambana ayembana kyawasi malu mee karamo dopale ingyuo sipyasa nambana suu pingi doko isa pupyamo karo.

¹³Kamongo, embame namba pyuo nyepala dakepa nyiso karape.

¹⁴Wambu nambapyao kumakalana lao suu pilyaminyi dupwa nyuo anamasi minyuo kyawa sisingi bolombalo laramo penale. Lapo namba randa nyipu dokopa rae maimi dupwa kapu kyepala elyo penale.

¹⁵Namba kando giyalya giyana pimi dupwa nakama isa palaminyi dokona elyame kumuo karenale.

¹⁶Embaketa epelyaminyi dupwa mona pyakalyuo pyaramopa rae maiyuo kararami. Embame pyuo nyiinyi dokona lao sangyu lao karaminyi dupwame yuu peparae lao, Kamongo doko baa aki Kamongo lao karenale.

¹⁷Namba mendali range palya nao mee isale karenge. Dopa pyuo karalonopape Kamongoembame namba kame see nange. Emba nambana Anatu nambana pyuo nyingi ingyuo karene dokome waiyako lao namba nyiso karape.