Psalms 31:1-11

¹(David ko wur) Yawe, ani nikate tairem, ni aninga bitaru se kari memek nuguting te memek me arigek ale dolirikko; nika munan diram te aga bataguru toko.

²Ni aninga guranek iki ale pasak ala aga bataguru toko; ni manga bo duruk iwita bagasam, se ani nika ningi yumurekko; ni aninga laturu se ani terong bagarik se kager kari me ta aga maguwumonko!

³Nunguningta, ni aninga kuwim yumura, se ni aninga sinar tasam; se nika nip ningo mu ko iki se aga diruwur ale lage ningo mu te agarak namarko.

⁴Kari memek dagarok kira gilingiman, ani te aga ilumonko, bare ni aninga sinar to se ani te memek me arigekko, mu awuk, ni aninga manga gek am.

⁵O Yawe, ani agata aimi ni kiting te betesam; ni kiwem nunguning la betera ko Kaem, ni aninga bataguru toko.

⁶Ani kariimet kaem kawel nunup patawusan mu me nunga kuesam; bare Yawe, ani mu nikate la ira sanami lagasam.

⁷Ni pempem la aninga kua lagasam, buta se ani nika amilmila lagarikko; mu awuk, ni aninga ikup yaman am ari ko iki saperem ale aga sangem.

⁸Ni kari memek nungarkiwerem se nuna me aga talipaman, mena; ni aninga sangem se ani asiwik sor ipi ningo mu te beterem.

⁹O Yawe, ni ani ago ko gemang batagukko, mu awuk, ani ikup biya ningi kaperem; ani nia mo lagerem ale amotam duap laga saparam, se angimik sokel menaram.

¹⁰Aninga ikup imi kumik menara mena ko iwita, se aga ma niara imi te pasak ala kua namarikko agila pa; ikup memek oworete ani angimik sokel menaram ale angimik galugaluk aram.

¹¹Kari memek alo owore nungumik te se, aga bagara suan agarki patesan, se aga tiran gar alo mu mel memek bo iwita agarki gilingisan, ale lage te agarkasan mu nuna nagu gilingisan.