Ola Saam 31:1-11

¹YAWEI, ai kaman langa yu blanga kipum mi seifwan. Nomo larram enibodi bidim mi en meigim mi sheim. Yu na det brabli haibala God, nomo garram enijing rong. Mi prei langa yu blanga seibum mi.

²Irrim mi na en seibum mi. YAWEI, yu jis laiga bigwan ston weya kipum mi seifwan. Yu jandap lida langa mi jis laiga bigwan wol blanga seibum mi.

³Yu na main seifhaus en yu maindimbat mi. Yu shoum mi wanim blanga dum, en lidim mi jis laik yubin pramis.

⁴Deigimat mi brom det trep weya ol main enami bin meigim blanga mi, dumaji oni yu na kipum mi seif.

⁵YAWEI, langa yu bingga na ai libum main spirit. Yu garra seibum mi, YAWEI. Yu na det brabli trubalawan God.

⁶Yu nomo laigim ol detlot hu weship ola drimin sheip, bat mi oldei trastim yu.

⁷Ai garra jidan brabli gudbinji en preisim yu dumaji yu garram olagijawan filing blanga laigimbat mi. Yu sabi main pein en ol main trabul.

⁸Yu nomo bin larram main enami olabat deigim mi prisana. Yubin kipum mi fri en seifwan.

⁹YAWEI, yu jidan kainbala langa mi dumaji mi brabli nogudbinji. Aibin kraikrai detmatj en mi brabli wikwan.

¹⁰Mi wikwan dumaji mi oldei jidan sedwan. Aibin kraikrai detmatj ai kaan jidan longtaim na. Ol main trabul bin meigim mi wikwan. Main bodi im brabli wikwan en ai kaan dum enijing mowa.

¹¹Main enami olabat tok langa mi, “Yu najing!” Ola pipul weya jidan wansaid langa mi reken mi rabishwan du. Main frenmob bradin blanga kaman gulijap langa mi. Wen olabat luk mi eniweya dei gibit mi bekboun.