Psalms 135:3-20

³Yawe nup patawuralko, mu awuk, nu Kaem ningo; wur te nup biya patawuralko, mu awuk, nu ningo pempem la.

⁴Yawe Israel atumukiram ale noko ma balam, Jacob mu noko mel ningo yawara.

⁵Ani ikisam anananga Kaem mu ko sokel aora garagar nup biya, nu kaem suen la nunga kiaram.

⁶Yawe kota ko gomang te la anapeya mel bitirukko mu beteso se arataso, taiti gomang te, ali imi te, gagi ningi, se gagi nukum du biya mu te.

⁷Nu taiti nuwi beteso se basuso; nu pure nikim tuwik ago beteso, ale marir beteso se arataso.

⁸Nu Egypt nunga kuriang gira bilangara mu nunga moram se kua sapaman, kariimet ko gue te, se buruk kausik ko gue te koma suanta.

⁹O Egypt, nu noko kausa se kiwem bibiya nika ningi beteram, nika Pharaoh se ko ura kari nungumik te beteram.

¹⁰Nu sor suen biya nunga maguwuram, ale nunga king sokel karogo mu nunga moram se kueman:

¹¹King Sihon, sor Amor mu nunga king mu se, sor Bashan mu nunga king Og se, sor Canaan ko king suen la, kua sapaman.

¹²Ale nu nunga ali bataguru tam ale noko kariimet nunga ali ko nungaram, noko kariimet Israel nunga ali ko ma balam.

¹³O Yawe, nika nip mu butata pempem anirukko; kariimet gue luan udagi mu ningi, nika nip biya butata ani lagarukko.

¹⁴Mu awuk, ni ka kariimet nunga giem ale bitua ningo te nunga bitarsam, ale gemang motam nungarsam.

¹⁵Sor saki nunga kaem mu, manga tam te agi, silver se gold te nunga nungurman, kariimet nongota nunga nuguting te nunga nungurman.

¹⁶Se nuna nuguring ago wore, me te munakasan, ale nomotam ago wore, me te loagasan;

¹⁷nuna nodogawa ago wore, me te den ikisan, ale nungamuru ago wore, sor siring te me ikisan.

¹⁸Se arikaya kaem kawel mu nunga nungurman ale ko nongomang ningi nunguning aram mu, kaem kawel mu bagasan uwutatala bagamonko.

¹⁹O Israel kariimet, nina Yawe nup patawuralko; O Aaron ko gue te ko priest alo, Yawe nup patawuralko.

²⁰O Levi ko gue te ko kariimet, Yawe nup patawuralko; nina awiriya noko nguangasan, mu noko nup patawuralko.