GWAY GI IDAWUU’D 135:3-20

³Maŋi Tap̱a mo, haali/ Tap̱a a’di i’bora’bor mo. Yuḵi gway gom gway piti mo, haali/ a’di ita’da manmii mii ga ’the mo.

⁴Haali/ Tap̱a kwanyki’da Yakuub gom is piti mo, Israyiil ita jim pitiŋ gana/ jin cila a’di mo.

⁵Haali/ aha/ misha Tap̱a ki a’di caaca mo dhali Tap̱am bana a’di di’da p̱owa risa rumi ’baar mo.

⁶Aris to gunn kun ’bori Tap̱a bwa mo tani uni miina a’di mo, e momis mo dhali e mony’cesh mo, dhali eya ris ḵumma/ yi’de/ mo dhali aris moŋ’kulga/ mo.

⁷A’di jin dhuki’da raḵ mmocu mo e mo jin dina mony’cesh ’kup̱ mo, a’di jin uḵki’da wara sho’k goma sho’k mo dhali a’di jin ḵalki ’tham ’peni moŋgu’b piti jin dhuna a’di uni mo.

⁸A’di ta a’di jin ’koshki’da bwanyara/ gi ’Kwani gi Pam Masir mo, kun tana bwanyara/ gi ’kwaniny’cesh dhali to/e mo,

⁹a’di jin diki’di bwaman /e mo, ayy Masir, jin hashki jamas mii mo dhali momer mo ap̱owa P̱irawn dhali aris c̱iŋkinam piti mo,

¹⁰a’di jin ’koshki’da ris kal gi ’kwaniny’cesh mo, dhali ’kosh imaliḵ kun c̱a’bki dem dem mo,

¹¹Siihuun jin ta’da maliḵ gi ’Kwani Amuur dhala Uuj jin ta’da maliḵ gi Pam Bashan mo, dhala ris ’peŋkuman bampa/ gi Paŋ Kanaan mo,

¹²dhali c̱i mony’cesh buni mmota mal, mmota mal gi ’kwanim piti kun ta ku ma Israyiil mo.

¹³Gway pini, ayy Tap̱a i’dimki ’kup̱ ki sule/ sule/ mo, /e mishu maŋ mo, ayy Tap̱a, ka ris ’kwani ma nyaḵum yil mo.

¹⁴Haali/ Tap̱a a’di midi ye ’kwanim piti mo dhali hila hil ki e ma ’thime/ ki mo/en ap̱o/ c̱iŋkinam piti mo.

¹⁵Tomp̱inycon kun luŋa kal gi ’kwanin tiya mo tani ta ’dolkon kush mo dhali ’dolkon gana/ mo, uni kun ta mii ki me’d gi ’kwani mo.

¹⁶Uni ta gi ’twa/ mo tani hili uni mol gwo o mo, uni ta gi e mo tani hili uni mol to p̱ar e mo,

¹⁷uni ta gi ’ce mo tani hili uni mol to ciḵ mo, walla shi/ina kamu/ di’d e ’twam buniya?

¹⁸Uni wana e ki uni gwansan kun uḵki uni mo – nye, aris uni gwansan kun gamki gwo is e uni mo.

¹⁹Ayy gu’b ma Israyiil, ’bori Tap̱a mii mo ma. Ayy gu’b ma Haruun, ’bori Tap̱a mii mo ma.

²⁰Ayy, gu’b ma Lawi, ’bori Tap̱a mii mo ma. Um kun ḵo/ki Tap̱a mo tani ’bori Tap̱a mii mo ma.