Yabura 135:3-20

³Wo xa Alatala matɔxɔ, barima a fan. Wo xa bɛɛti ba a xili matɔxɔfe ra, barima a rafan a ma.

⁴Alatala bara Yaxuba sugandi a yɛtɛ bɛ, alako Isirayila xa findi a xa ɲama fanyi ra.

⁵N tan a kolon a Alatala gbo, won Marigi dangi alae birin na.

⁶Alatala a waxɔnfe rabama nɛ koore nun bɔxi ma, a a rabama nɛ baa tilinxie ma.

⁷A nuxuie ratema keli duniɲa tunxunyi naani ma, a tunɛ rafa nun seyamakɔnyi, a foye xungbe ramini a ragatade kui.

⁸A Misira di singee birin faxa, keli mixie ma han a sa xurusee li.

⁹A naxa tɔnxumae nun kaabanakoe raba Misira, Firawuna nun a xa walikɛe birin xili ma.

¹⁰A naxa sie wuyaxi bɔnbɔ, a mangɛ sɛnbɛma gbegbe faxa.

¹¹A naxa Amorikae xa mangɛ Sixɔn, Basan mangɛ Ogo, nun Kanaan mangɛ birin xa bɔxi tongo,

¹²a naxa a fi a xa ɲama Isirayila ma kɛ ra.

¹³Alatala, i xili mu lɔɛma abadan, i xili ifalama nɛ tɛmui birin,

¹⁴barima Alatala fama nɛ a xa ɲama gbeɲɔxɔde, a fa kinikini a xa konyie ma.

¹⁵Si naxee mu Ala kolon, e kuyee yailanma xɛɛma nun gbeti nan na e bɛlɛxɛe ra.

¹⁶Dɛ na na kuyee bɛ, kɔnɔ e mu wɔyɛnma. Yae na e bɛ, kɔnɔ e mu se toma.

¹⁷Tulie na e bɛ, kɔnɔ e mu fe mɛma. Ɲɛngi yo mu e fate i.

¹⁸E rafalamae xa lu alɔ e tan, a nun naxee birin lama e ra.

¹⁹Isirayilakae, wo tan xa Alatala tantu. Haruna bɔnsɔɛ, wo xa Alatala tantu.

²⁰Lewi bɔnsɔɛ, wo xa Alatala tantu. Wo tan Ala yaragaaxuie, wo xa Alatala tantu.