يَبُرَ 135:3-20

³وٌ شَ عَلَتَلَ مَتْشْ، بَرِ مَ عَ قَن. وٌ شَ بّيتِ بَ عَ شِلِ مَتْشْقٍ رَ، بَرِ مَ عَ رَقَن عَ مَ.

⁴عَلَتَلَ بَرَ يَشُبَ سُفَندِ عَ يّتّ بّ، عَلَكٌ عِسِرَيِلَ شَ قِندِ عَ شَ حَمَ قَنيِ رَ.

⁵ﭑ تَن عَ كٌلٌن عَ عَلَتَلَ فبٌ، وٌن مَرِفِ دَنفِ عَلَيٍ بِرِن نَ.

⁶عَلَتَلَ عَ وَشْنقٍ رَبَمَ نّ كٌورٍ نُن بْشِ مَ، عَ عَ رَبَمَ نّ بَا تِلِنشِيٍ مَ.

⁷عَ نُشُييٍ رَتٍمَ كٍلِ دُنِحَ تُنشُنيِ نَانِ مَ، عَ تُنّ رَقَ نُن سٍيَمَكْنيِ، عَ قٌيٍ شُنفبٍ رَ مِنِ عَ رَفَتَدٍ كُي.

⁸عَ مِسِرَ دِ سِنفٍيٍ بِرِن قَشَ، كٍلِ مِشِيٍ مَ هَن عَ سَ شُرُ سٍيٍ لِ.

⁹عَ نَشَ تْنشُمَيٍ نُن كَابَنَكٌي رَبَ مِسِرَ، قِرَوُنَ نُن عَ شَ وَلِكّيٍ بِرِن شِلِ مَ.

¹⁰عَ نَشَ سِيٍ وُيَشِ بْنبْ، عَ مَنفّ سّنبّمَ فبٍفبٍ قَشَ.

¹¹عَ نَشَ عَمٌرِكَيٍ شَ مَنفّ سِشْن، بَسَن مَنفّ عٌفٌ، نُن كَنَان مَنفّ بِرِن شَ بْشِ تٌنفٌ،

¹²عَ نَشَ عَ قِ عَ شَ حَمَ عِسِرَيِلَ مَ كّ رَ.

¹³عَلَتَلَ، عِ شِلِ مُ لْيمَ عَبَدَن، عِ شِلِ عِقَلَمَ نّ تّمُي بِرِن،

¹⁴بَرِ مَ عَلَتَلَ قَمَ نّ عَ شَ حَمَ فبٍحْشْدٍ، عَ قَ كِنِكِنِ عَ شَ كٌنيِيٍ مَ.

¹⁵سِ نَشٍيٍ مُ عَلَ كٌلٌن، عٍ كُيٍيٍ يَءِلَنمَ شّيمَ نُن فبٍتِ نَن نَ عٍ بّلّشّيٍ رَ.

¹⁶دّ نَ نَ كُيٍيٍ بّ، كْنْ عٍ مُ وْيّنمَ. يَيٍ نَ عٍ بّ، كْنْ عٍ مُ سٍ تٌمَ.

¹⁷تُلِيٍ نَ عٍ بّ، كْنْ عٍ مُ قٍ مّمَ. حّنفِ يٌ مُ عٍ قَتٍ عِ.

¹⁸عٍ رَقَلَمَيٍ شَ لُ عَلْ عٍ تَن، عَ نُن نَشٍيٍ بِرِن لَمَ عٍ رَ.

¹⁹عِسِرَيِلَكَيٍ، وٌ تَن شَ عَلَتَلَ تَنتُ. هَرُنَ بْنسْي، وٌ شَ عَلَتَلَ تَنتُ.

²⁰لٍوِ بْنسْي، وٌ شَ عَلَتَلَ تَنتُ. وٌ تَن عَلَ يَرَفَاشُييٍ، وٌ شَ عَلَتَلَ تَنتُ.