Text copied!
CopyCompare
Paama Bible - Sam keil

Sam keil 112

Help us?
Click on verse(s) to share them!
1!Rehehati lat isen Iahova! Koakeil avouhou min Iahova ito en sien. Koakeil e vati avousil revi mengkatien keil onen, keil isi keil en avong vasi.
2Titiali keil one imai ihi avat keil ten kantri one. Tokolkatien onen Ahi hel en koakeil akistal ran vatiamal onen koakeil amal en meten.
3Vatiamal onen ihotin tahosien ka tokolkatien, umen one koa amumoni musil sakien ten maluen hel lisenges.
4Moulien one mul kataun more meatin keil suval laet koa ritin en out koa malikelik. Keil atahos min mesav keil ka arie lat enmahisien min keil, umen keil one mal imok.
5Hetahos min koakeil amumon umen one en sise tai koa mal, ka asa maen tounah one min meatin sav keil ral min rendemien koa tahos.
6Vati meatin keil koa amal imok mukok, avong keil takeih sakras vapurun keil, ka meatin sav keil e rovobongentei sakien tetahos keil one.
7Keil armetautei navong akur longlongien tai koa tisa, veni demkatien one keih ka akilea keke Ahi hehi eikokoe en keil.
8Keil armundemkotei ka armetaun etai tounah, veni akilea keke Ahi hehitan en vativieh keil one.
9En avong vasi keil asan kataunien min koakeil atamurei en tounah, sakien keil one mal lisenges. Keihoen mul en he ka meatin keil avouhou min keil.
10Navong meatin tisa keil ales keil, tine kat keil ka mete vilhili kat keil. Ka lingkatien keil onen koakeil atisa hemai hehi heisav enges ka ivupuol.